2014年12月21日 星期日

大喊包

尋日一揍二, 住隔離既表姐一聽到晴晴起身已經拍門要黎玩, 兩個小朋友係就係玩得不亦樂乎, 但要嘈起上黎都好大獲, 唔係大家玩既野唔一樣 (晴晴係都要表姐陪佢玩同一樣既野, 但表姐玩兩野已經想玩第二樣, 晴晴又唔制...), 就係大家爭同一樣既玩具玩, 唔係同顏色既積木, 就係煮飯仔同一隻煎pan... 到lunch時各自返屋企食飯, 表姐唔係好想走, 晴晴突然講左一句, "你阻住晴晴食飯喇...."  O晒嘴

到食完飯表姐又過左黎玩, 今次玩玩下仲開拖, 用積木互片, 總之就係嘈到飛起, 當然呢一整日晴晴都喊左好多次, 每一次唔鍾意就喊

到黃昏要沖涼時又唔聽我話, 俾我鬧, 但仲要俾佢打左一下, o個一下真係嬲到出晒煙, 但冇再同佢嘈, 亦冇再打返佢, 係唔睬佢, 搞掂晒抱返佢出廳我就沒收晒所有玩具, 當然晴晴又喊過, 但我一直冇理到佢, 喊到由toilet出返廳都仲係喊, 喊到婆婆返黎食飯因為呢個大靠山返左黎而收晒聲仲唔理我tim

好啦, 都夜晚o係隔離食完飯, 要交換禮物, 拎到返屋企已經第一時間要我拆晒俾佢玩, 但佢仍然心思思放左o係聖誕樹o個份禮物, 佢以為當送左俾表姐o個份送走左既時候佢亦都可以拆埋自己o個份, 但因為當時已經夜, 而且睇得佢係好眼瞓, 本打算一返到屋企就俾奶佢飲後就夾佢入房瞓, 所以點都唔俾佢咁做, 佢就一直喊, 喊到唔肯收聲, 有時喊到累要抖一抖就玩同表姐交換返黎o個set Lego, 玩到咁上下抖夠又大喊過, 前前後後已經喊左5,6,7,8次, 到最後爸爸放到工返黎就自動收聲, 因為佢知道爸爸講過唔會俾佢提早拆禮物

到最後臨瞓前晴晴係喊到雙眼腫晒.....而且已經攰到放盡晒電, 所以好快就瞓著左, 點知瞓唔夠一粒鐘就發惡夢喊醒左, 又爆喊過, 點氹都唔收聲, 乜都扭, 又係要爸爸收拾殘局

日抖喊得多真係好大獲, 所以我都唔係太想佢地兩老表玩得太埋同成日一齊玩, 怕左....

2014年12月18日 星期四

家中有女初長成

"家中有女初長成"   呢一句真係好應景

17至19號係晴晴間幼稚園一連3日既聖誕表演, 分晒唔同班唔同時段, 晴晴班係尋日上晝第一個slot, 可以比平時晏少少起身同返學, 但都搞到差o的遲到, 仲要連一早突登買定要黎上台表演著既白色波鞋都唔記得左帶, 當下真係灰左

原來好多家長一早o係學校門口排隊等開門務求要坐到禮堂最前排位置睇小朋友表演同影相, 我地今次真係棋差一著了, 我地去到禮堂時已經得返後排位置, 影唔到靚相, 但好彩都睇得好清楚, 靚相就唯有等學校安排

見到晴晴跟住成班小朋友一齊上台, 個樣好得意, 動作又做到亂晒, 人地未做佢已經做先, 見到佢上台個樣已經覺得好感動, 諗返起呢個人仔, 由一舊小粉團, 好乖咁任我舞, 依家識行識走識駁嘴, 仲上台表演, 真係好難想像, o係屋企望住佢覺得都仲係一個bb仔, 出到去就似返一個小朋友, 大個喇, 唔再係baby, 會開始愈來愈獨立, 愈來愈少依賴屋企人, 所以真係盡量唔會放棄任何一個可以俾我管接管送既機會, 就算朝早返工會遲到, 都要帶埋個女等佢上左校車我先返工, 話咁快幼稚園K1已經返左3個月 (雖然10月份大部份時間都冇返學, 數埋只係返左4日學....), 真係轉眼間就過....

放左學後就返屋企食埋午飯再出去買聖誕禮物, 其中一個task係要同個女影一年一度既聖誕相

因為凍, 唔想周圍走, 近近地太古城就算, 點知今年個佈置真係好令人失望, 而晴晴就因為對個佈置毫無興趣, 而且個心已經向住買聖誕禮物呢件事, 所以真係冇乜點影, 影左一千零一張 (都冇睇影得好唔好...)

我就好失望, 晴晴就搵到佢好心愛既麵包超人個藍精靈毛公仔同埋個斜背手袋, 仲鍾意到唔要小白兔同小狗陪佢瞓, 同一位置已俾藍精靈取代左... 

同埋佢揀左一副lego公主城堡 (佢真係好鍾意呢set lego, 點都要買返呢一盒, 問佢要唔要其他如煮飯仔廚房, 佢話唔要, 因為已經有喇!! 好surprise佢會識得咁講...), 另一樣佢都好想要既係一個好colourful既玩具琴仔但佢唔會話屋企已經有而唔使買多一個囉....  爸爸問佢要邊一樣, 晴晴就話兩樣都要 (我聽到佢呢句自己就覺得好好笑!!) 最後爸爸要佢揀要lego定琴, 佢就放低個琴 (仲同個琴byebye話下次再買返你 @@"), 但返到屋企已經急不及待想要拆左盒lego, 爸爸唔俾, 真係慘慘豬, 每次有機會就想借o的二搣爛張花紙, 但都俾我貼返, 又成日問我過年未, 因為佢要玩2015年麵包超人月厝上面既sticker XDDD


2014年12月9日 星期二

學校欺凌

話說, 晴晴有一段時間突然好唔鍾意返學, 細問下原來佢俾同學仔吐口水, 而且唔止一次

同老師了解左, 已經冇事, 點知, 尋日, 又出事, 今次係另一個男同學

忍無可忍之下, 今日一早踩上學校, 本來想搵校長, 去到學校門口見到園長就園長都照搵, 原來老師尋晚就呢件事已經同園長report過同開會

當然, 唔會assume園長講既野會有咩野突破, 咪又係一輪官腔, 又話小朋友應該係冇心呀, 控制唔到個口呀, 有時一齊玩在所難免, 等等, 但佢地亦promise會盡量睇住小朋友, 我都唔知可以再做o的咩野, 自己個女俾同學仔咁蝦真係好嬲又心痛, 嬲到feel到自己血壓上升, 但點解又偏偏係我個女先有咁既情況?! 真係好無奈, 口水呢家野真係好dirty, 已經係大班, 仲要玩埋呢o的野, 真係唔能夠忍受, 希望今次親身上學校同園長傾完, 佢地真係會正視呢件事同埋留意多o的

只想晴晴開開心心安安全全咁返學, work hard play hard

2014年11月6日 星期四

K1第三個月開始

新居既裝修進度真係十分之慢, 由初時預10月中可以搬返去, 到現在10月尾先搬得成...仲岩岩好可以接住晴晴11月開始返學坐校車

每朝7點半前起身, 飲水又飲得慢, 食麵包又食得慢 (試過準備左通粉俾佢但唔食, 係都要食麵包), 又要換衫, 又唔俾我出門口先 (媽媽最遲8點10分一定要出到門口, 晴晴校車8點25分到, 仲有大把時間...), 所以每朝都要喊一大輪扭一大餐先搞掂, 不斷捽眼, 一時又係咁呻鼻水, 總之真係唔知點搞, 依家點都要跟我一齊出門口, 送到我去地鐵站, 之後就自己跟婆婆行返去校車站

放學就婆婆接唔坐校車, 可以早約半小時返到屋企, 之後就會食午飯, 瞓午睡

每日都想盡早返屋企同晴晴玩, 但每次我返到去, 晴晴食緊飯, 就變得極不合作, 婆婆話午飯時晴晴唔使一小時就可以完成晒, 但夜晚我一返到屋企晴晴就會走圍走, 食兩啖又會咳, 真係激C我, 所以都好struggle我夜晚應該要幾點返屋企好, 如果7點先返到, 我做得晒家務煲落湯沖埋涼已經成8點半, 但晴晴9點左右就要開始準備瞓覺, 我都冇時間真真正正陪到佢, 平時一般6點半已經可以返到去, 真係好煩惱

好多時氹到晴晴瞓覺我又會一齊瞓著埋, 咁又一晚, 往往扎正時已經係3, 4點, 但仲有好多野未做, 例如要準備晴晴既飯餸.... 真係好大獲

晴晴仲係咳, 主要係一早同臨瞓前, 瞓醒晏覺都會咳, 睇開個中醫又放左假未返, 尋日就試左用鱷魚肉煲湯, 會每星期都煲一次試住先

晴晴o係學校好多時仲會俾同學推跌, 老師又睇唔到咁多, 仲同婆婆講聽唔明晴晴講咩野!!! 我知晴晴講野仲係有好多bb話, 但作為一個咁senior既幼兒教育者, 我接受唔到佢地可以用呢個藉口黎開脫, 永遠話對方唔係有心, 所以作罷, 我亦唔係要找麻煩, 只想知道老師會唔會認真咁教導返同學推人係唔岩, 要講sorry, 要認真地知道咁樣係錯既, 但我唔知依家係一個同學推跌晴晴好多次, 還是唔同同學都推跌過晴晴, 係唔係大腿肌肉夠力就唔會跌到呢? 如果佢好大力咁推人想唔跌到都難囉... 呢個幼稚園既老師, 真係好得人驚..... 一定唔會recommend俾人囉... 自認已經落左賊船.....

每日作息時間:
7:20      起床
7:30      換衫, 飲水, 食早餐
8:10      陪媽媽返工再等校車返學
12:30    放學回家
12:45    午飯
14:15 - 17:00     午睡
18:00    晚飯
20:30 - 21:00    奶一枝
21:30     入房瞓覺, 但點都要磨到2230先瞓得著....


2014年10月29日 星期三

開學兩個月

9月差唔多返足咁多日學, 點知10月開始就做左逃學威龍...

開學頭1個月, 俾同學推跌左兩次, 去唔到自己prefer o個格toilet而大喊一場, 之後就唔係好肯返學, 平時一叫就醒, 依家會賴下床

9月尾開始病, 變成氣管敏感, 睇左4次西醫都唔好, 半夜會咳醒, 好多日都冇返學, 10月份只返左兩至三日學

因為咳同痰多, 已經好多日冇飲奶, 早餐可以食到半個至3/4個腸仔包, 最近都有返新居瞓過兩三日, 可以晏少少起身, 又晏少少出門口, 但始終未完成, 所以都要再o係婆婆度住多三幾日

我只想晴晴身體健康, 睇見隻豬仔咳成咁真係心痛C

希望11月份開始一切回復正常啦......

2014年9月10日 星期三

K1開學了

放了一星期長假, 為了陪晴晴開學, 帶佢返學放學, 陪佢上左兩日堂, 之後就要自己上堂了

做FTM呢一個星期真係好開心, 開心既時間係過得最快, 真係好想自己帶女返學放學全天候照顧....

返學第1日, 只需於9am至11am返到課室取書包校服就ok, 9點9出門口搭巴士但遇上塞車, 最後10點20分左右落車, 晴晴全程自己行, 由巴士站行去學校仲要行條長斜路, 再爬上4層樓樓梯先去到自己個班房, 真係唔能夠想像呢個小朋友咁有耐力... 仲要自己背住個小背包

因為好晏先去到, 老師俾左一大堆通告我地, 仲有書包同校服, 晴晴就自己玩, 冇幾耐就要散水, 之後我地返左舅公屋企食lunch, 再返利東煮晚飯, 晴晴仲食左一大碗炒飯... 10點未夠就瞓著

第2同第3日, 返9放9點9, 媽媽陪上堂, 全程自己搞掂, 我只係企埋一二邊睇住佢, 因為仲係適應階段, 呢兩日會分3個slot返學, 數過呢個slot有19位小朋友, 大部分都係學校既N班升上黎, 所以佢地都好熟悉o係課室活動既規矩, 相對晴晴要多o的時間熟習, 有時會到佢既不安, 但佢冇喊, 只會靜靜咁望下其他小朋友做乜, 佢就會跟住做, 呢兩日老師會分兩批小朋友進行活動, 有唱遊, 玩樂器, 聽故事, 做勞作, 又影左張相留念咁, 時間過得快又輕鬆, 晴晴都話返學好開心

最搞笑係, 老師講緊一個小朋友要開始返學既故仔, 好多小朋友會好active咁舉手講自己點點點, 例如食左咩野早餐, 晴晴都唔會執輸講埋一份, 仲要埋起身... 但最感動係, 唔知講到邊一節, 晴晴突然轉頭望住我, 同我講, "媽媽, 晴晴都會比心機返學架...."  估佢唔到囉...

第4, 5日, 晴晴要自己上堂, 返9放10點15分, 分兩個slot, 即係又多左小朋友一齊返學, 我地只能帶到晴晴去班房門口, 佢要自己入去, 放返本體溫簿入書包, 再放書包上木櫃 (有自己個名同相), 之後就要去洗水間洗手, 晴晴都好獨立, 自己一個冇問題, 都有同我地揮手byebye, 之後我地就去就近茶餐廳hea食早餐, 又周圍行下, 好快又要接放學, 呢兩日晴晴都好叻, 冇喊, 每次接晴晴放學都會話返學好開心, 之後就會拖住我跟住o的同班小朋友行落車站, 話要跟住o的小朋友囉... 完全唔聽人講, O晒嘴, 放左學要求坐電車返舅公度同表姐玩同食lunch, 下午就返屋企準備晚餐同沖涼, 一切都好smooth, 6點沖涼6點半開飯, 8點半飲埋枝奶9點3就會入房準備瞓覺, 所以朝早起身都唔會太難叫醒

9月8號開始就返兩個鐘, 開始一大班人上堂, 其實我好擔心, 始終我要返工, 往後都要婆婆帶返學放學, 有野又問唔到老師, 返工時又會好掛住個女唔知佢點, 希望快o的搬返北角, 咁就可以返工前帶晴晴上校車, 放到工又可以趕返屋企揍返個女... 晴晴比我想像中好好, 其實我冇諗過晴晴返學會唔會喊, 會唔會唔習慣, 都係睇到時先知, 但其他人常說擔心喊唔肯返學呢樣野就真係冇發生過, 我都好proud of晴晴既表現真係十分唔錯, 真係大個女喇...


2014年8月25日 星期一

晴天霹靂

下星期晴晴正式開始20年既學生生涯, 尋日就收到老師電話通知返學安排:

9月1日, 9-11內任何時份返學校領取校服, 書包, 課本等
9月2至3日, 返9放9:45
9月4至5日, 返9放10:15
9月8, 10, 11日, 返9放11

細問之下, 晴晴o個班竟然係1班50人!!! 50人迫埋一個班房, 真係嚇親, 今年學校K1安排係一班大, 一班細, 細班有28人, 由兩位老師負責, 晴晴o個班大班由4位老師負責, 師生比率差唔多, 但實在不太滿意一班50人既安排, 原因係K1一樓只得一個大課室同一個細課室, 唔能夠平均咁分配班級同人數, 聽完真係好後悔放棄寶血個學位呀... 寶血每班30人, 都係獨立班房, 環境好好, 仲係由3位老師負責, 雖然無學劵但如果早知係咁我真係唔會放棄寶血囉, 而且當我打電話返學校問點解有大班同細班安排既時候, 學校職員同主任老師既態度真係有改善空間, 其實我聽完佢地講既野都幾hard feeling, 但一切已成定局, 冇辦法, 真係唯有自己煲多o的湯水俾晴晴打底....

新屋已收樓, 做緊裝修, 但預計要8星期才能完工, 晴晴頭個半月都要大長征由鴨利洲返學. 由鴨利洲出市區只有一條鴨利洲大橋同香港仔隧道, 8點前上到車都算ok, 唔會點大塞車, 但好快會出到北角, 7點半前搭車冇咁迫人, 但7點半後就會超多人, 8點後出發雖然會塞但預計車程唔會超過45分鐘, 大前題係唔想晴晴咁早就返到學校, 最好係8點45分返到, 但路程咁遠又咁多unexpected event happen真係好難match到呢個target, 最想返學坐的士但聽聞冇乜的士肯呢個時候經香港仔隧道, 真係諗到頭爆, 唯有下星期逐日試


2014年8月13日 星期三

零準備

晴晴全職hea玩既階段好快就要轉變...

對晴晴黎講係冇放假/暑假既概念, 因為每天起身就係睇ipad玩玩具睇電視食飯食奶 (即係食玩瞓), 只係夜晚唔肯瞓, 距離K1開學仲有兩個半星期, 但我地都未準備好, 初時有諗過7月開始要train晴晴早睡早起, 但真係好難, 加上搬左屋後晴晴既生活習慣變左好多, 又瞓得唔好, 所以到呢一刻都冇乜點準備

見其他K1已經陸陸續續開學, 晴晴間學校係9月1號開學, 不過1號並唔係正式返學, 只係返去拎書包校服同書本, 冇一個fixed返學放學時間, 之後4日先叫做上下堂, 由1小時加至2小時, 第二個星期先正式返3小時.... 其實我好擔心唔知個女返學時會點, 最怕佢未識得照顧自己, 返到學校有冷氣地方要著外套, 玩到熱就除, 之後平靜左就要著返, 又怕佢好易生病, 又驚佢返學日日都做大喊包, 真係十萬個worries

頭兩個月都要由香港仔返學, 冇辦法, 新屋下星期才開始裝修, 師傅話最快都要8星期, 晴晴每次坐巴士由香港仔去到北角未落車都已經瞓著, 仲要叫極都唔肯起身, 所以返學呢程車都唔知點算, 放學就易辦好多.... 其實到搬返北角後晴晴都係坐校車返學, 但車程短好多.....

好難想像個女開學後會變成點....

2014年7月21日 星期一

不得了, 愛上了雲呢拿雪糕

真係大大獲, 一直都唔俾晴晴接觸雪糕呢樣野, 自從搬左去婆婆屋企, 有一日婆婆同晴晴一人一啖食左杯細既Dreyer's之後, 就每日都要扭食 "一杯"

其實係1/3杯至半杯左右, 但我都好擔心, 一來要用呢樣野黎迫晴晴食飯, 真係唔多掂, 而且又凍又甜, 自己就唔prefer俾佢食咁多, 依家仲要日日扭一餐, 真係暈

有時見晴晴坐o係梳化自己"筆"雪糕真係好得意, 佢會請我食, 請婆婆食, 都算幾乖, 只係依家每食一餐飯都會扭下文, 一係就話唔食, 一係就周圍走, 一係就話眼瞓自己行入房瞓唔理我, 咁點算呢真係

叫佢唔好做既就愈要做, 前晚又整損左下巴, 有少少發炎, 唯有用少少粉紅色o個隻消毒藥水黎清潔個傷口, 上次都好乖俾我整佢, 今次直頭唔肯, 到扭到婆婆幫佢清理完後, 仲要個個上唇咬住下唇近傷口既位置, 真係急C我, 驚佢食左o的消毒藥水, 點知愈叫唔好愈要做, 嬲到我唔理佢, 最後先say sorry, 但我已經俾佢呢種行為激到我七孔生煙

買左塊新既麵包超人砌圖俾佢, 第一次玩真係玩得好好, 又有耐性, 仲邊玩邊食晒大半碗飯, 自己都可以砌到8成, 到砌完晒之後就冇心機玩, 玩兩野就飛走晒o的砌圖, 咁點得架....

真係O晒咀, 唉, 兩父女都係咁, 冇眼睇

2014年7月6日 星期日

搬家了

上個月將舊居變賣了, 新居還未交吉, 所以要搬到晴晴婆婆家中暫住

小朋友應該仲未好習慣新環境

搬到晴晴婆婆家已經1個星期, 晴晴婆婆住的是沒有固定間隔的公屋, 其實環境尚可, 只是有點嘈, 唔知係唔係呢個原因, 晴晴瞓得特別少, 平時12點前點都會瞓著, 依家要12點後才瞓著, 但半夜總會起身小便, 第二朝很早就醒, 但又唔肯瞓午睡, 真的很頭痛... 依家平均每日都冇12小時睡眠

去到婆婆屋企, 晴晴曳左好多囉, 好明顯唔聽話, 唔聽指令, 仲會突登做壞事, 面不改容, 激到我嘔血

依家唯一好處係就近有個公園, 天氣ok既話婆婆每日都會帶晴晴去玩返半粒鐘

希望晴晴可以快o的適應, 現在希望10月可以搬到新居, 但可唔可以on schedule仍然係未知之數...

2014年6月11日 星期三

3歲了

好耐冇update話晴晴既status, 最近好忙, 所以晴晴既3歲生日慶祝都冇乜點well prepared到, 都係, 簡簡單單咁一家人食餐飯, 晴晴當晚食左好多件乳鴿, 生日蛋糕就食左大部份生果, 仲食得好開心...

3歲, 小朋友了, 唔再係baby, 有以下既表現:
1. 所以成個人都老積左好多, 出街前會開我個手飾箱帶晒我所有既手鍊, 我問佢夠未呀, 佢會話未夠呀

2. 表達能力一下子進步左好多, 雖然咬字仲係差 (識得講連接詞如 "不過咁", 成日話好掛住你 (當佢知道自己激嬲我時要求原諒), 大人講野時佢話叫你 "暫停", "你地好嘈呀"

3. 識得數數目 (數到明明自己個袋有3罐零食, 婆婆o係佢唔為意情況下拎走兩罐, 當晴晴發現時佢就話明明有3罐架.....); 識晒A to Z for what, 抽問佢都識答, 完全出乎意料之外, 我assume呢兩樣野俾佢返學時學, 平時佢都係靠睇you tube學返黎, 顏色既中英文都係, 好多野佢係不知不覺間學識, 證明傳統教學呀, 要背書C 讀o個o的真係未必適合佢....

4. 識得成日扭要去街, 要同爺爺麻麻太婆飲茶

5. 唔聽話既情況愈來愈嚴重, 唔止唔聽, 仲會用埋個表情話你知我唔高興你咁話我 (鄒晒眉頭, 鼓埋泡腮, 唔望你...)

6. 扭計扭得好勁, 好易大喊

上年同舊年比較, 真係瘦左好多, 食飯愈食愈耐, 最長要兩粒鐘先食晒一餐飯, 唔係好肯飲水, 要迫先飲, 高度同重量都係差唔多

作息都算定時既, 晚睡晚起之嘛(!?).... 每晚11點幾先肯瞓, 第二朝咪11點幾先醒囉, 9月開學返上晝班都唔知點算, 到時每朝7點起身, 8點出門口, 真係唔敢想像...




2014年4月21日 星期一

35個月

依家真係唔可以呃呢個女....

話說, 晴晴搵到枝o係$10店買到既伸縮棒 (用黎掛窗簾), 好開心咁拎黎玩, 佢想扭長枝棒, 整整下整唔到, 就叫我幫手, 我偷偷地縮返短扭返實再話好整唔到諗住hea佢, 點知佢話我要掉返轉黎扭先得架.... =.=  呢句說話佢講得好清楚, 我聽到o個下真係O晒嘴, 心諗, 點解你會知我掉轉左黎扭所以扭唔到既呢??

仲有一樣野好搞笑, 係當晴晴o係權威人士既壓迫下而唔能夠做到佢想做既事時, 佢真係好好好委屈架....

有一晚, 得我一個揍女, 因為要拎飯盒, 就返左我舅父屋企食飯, 返到去有表姐一齊玩, 玩到咁上下一定會掙玩具爆喊, 又或者玩到反晒面扭晒計喊要返屋企, 呢一次係晴晴主動話要返屋企, 仲要我抱佢返屋企, 因為好多野拎, 又得我一個帶住個女, 舅母就陪我地一齊返去, 舅母要晴晴自己行, 唔俾抱, 一出門口晴晴既眼神已經好唔開心, 邊行邊想喊, 嘴扁扁, 又流左一滴眼淚, 但冇大聲喊, 到行到返屋企, 平時晴晴一返到屋企必定會周圍走唔肯換衫 + o係梳化椅度hea, 今次佢好靜咁自己行左入房, 坐o係自己張床上面, 冇幾耐就大喊, 喊得好淒涼, 要我抱住, 其實我係覺得好好笑, 好笑晴晴既表現真係好大個, 而且已經有自己既感受, 3歲小朋友就係咁... 晴晴唔再係bb喇......

2014年3月20日 星期四

幼稚園學費

同晴晴in左咁多間幼稚園,有學劵如冇學劵既都有試,一直冇乜留意學費呢樣野...

一直諗有學劵既幼稚園學費都唔會太貴, 睇左好幾年既KGP感覺上學費都冇乜點加

初時計過數, 就算俾晴晴讀冇學劵既幼稚園, $3000一個月都仲可以負擔到, 最緊要間學校岩晴晴. 直至尋晚, 留心睇上星期某間幼稚園既通告( 亦打算會俾晴晴讀呢間), 係講有關學費、雜費、校服, 書簿等等, 發覺2014年度既學費既加幅真係好驚人.... 

2013-14年度全年學費$25,190, 扣除$17,510學劵, 全年係$7,680, 呢間學校係收11個月學費(有o的學校只係收10個月), 每月$698.20

2014-15年度全年學費 $29,150 (呢個數係由佢份9月份學費繳交事宜上, $2,650, 即$2,650 x 11 = $29,510), 扣除$20,010學劵, 全年$9,140, 每月830.90

好老實如果呢間學校冇學劵真係唔會考慮, 寶血都係$2,500.... 就算政府學劵加碼, 唔等於我地可以平到學費, 實際上仲要係貴左, 加左成19%, 我份人工都冇加咁多, 頂多只係4%樓下

以前冇學劵, 幼稚園學費都唔係平, 係就係俾少左, 只係覺得, 政府加呢o的benefit既得著唔多囉.... 幼稚園既生意真係愈做愈有....  

2014年3月2日 星期日

收到AM Offer

上兩個星期突然收到衛理堂電話, 話佢地依家上晝班有位, 問我會唔會考慮轉 (仲考慮咩, 真係快快應承tim la~~), 好彩佢提3月15號交表時去返上晝班o個條隊, 完全唔記得3月15號要交學生表格.... 一直都等緊衛理堂都寶血轉上晝班既confirmation, 初時都好心急, 但等得耐左, 心諗好大可能都要等到臨開學前先有通知, 點知衛理堂已經有offer, 真係好.....

晴晴呢幾日都有燒, 由大傷風起, 初時都冇事, 過左一日就開始發燒, 第二日再睇多次醫生先發現喉嚨同耳仔都紅左, 發炎, 所以醫生加左隻消炎藥, 晴晴呢幾日都係食粥or字母粉, 湯都唔敢煲, 意米水又飲左好幾日, 燒係退左少少但每每都下午時候開始就燒返, 食退燒藥既效果都唔太明顯, 同埋晴晴成日話個口裡面痛, 尋晚同佢搵電筒照下睇下咩事, 原來出大牙, 第20隻牙終於都出, 仲要一出就大半隻, 以前晴晴出牙都出得好慢, 上兩個星期望完晴晴個口仔先諗, 最後一隻大牙仲係一o的白點都唔見有, 話36個月大前會出埋架嘛, 點知突然間一出就大半隻, 希望晴晴快o的退定燒啦.....


2014年2月8日 星期六

K1的最後interview + 第一次參加爸爸公司的春茗

呢一日既天氣真係麻麻, 開始轉涼, 陰天再加上落毛毛雨, 真係唔多想出街

可幸今日既interview時間係下晝3點50分, 岩晒呢個起晏身加食飯慢吞吞既baby, 但最後都要飛的先趕到...

呢間被譽為神級學校既其中一間, 其實只係俾晴晴試下, 因為interview只限小朋友自己入課室同老師傾計同玩 (但排隊期間都有遇到o的唔友善既家長, 不過算了吧....), 同晴晴o係有蓋操場排隊時都幾大風, 好彩都有同晴晴著晒厚衫, 等既時間晴晴又係見到個滑梯又要玩, 係不停咁重覆左好多次, 當時勁驚晴晴會扭計, 好彩最後都好乖, 等左15分鐘左右就入去登記班房證記, 之後就上1樓waiting room, 呢個時間家長仲可以陪小朋友一齊, 其間老師都有問每個小朋友叫咩野名, 問邊個帶黎interview呀... 晴晴都肯答(可能心情好...), 到之後要交封interview letter俾晴晴, 一個跟一個咁入班房, 家長就o係走廊等, 等左唔夠5分鐘就見o的一隻隻鴨仔拎住張紙走出班房 (當時個情景真係好搞笑好得意), 至於考乜真係唔知, 無論我點問晴晴, 佢都唔係好答我... 不過都好proud of晴晴冇扭計, 可能有其他小朋友一齊, 而且覺得學校個安排真係幾好, 根本冇時間俾小朋友去諗冇家長陪而扭計 (反應唔切...) 由出門口到返到屋企都係一個鐘左右 (返黎我地慢慢行去巴士站, 晴晴又肯自己行, 幾好...)

返到屋企就沖涼食飯, 又扭左一輪計, 最後搞到成6點半先出到門口, 由北角出發去青衣城食晴晴爸爸公司host既春茗 (結左婚後我每年都要被迫出席, 次次都係撞岩屋企人團拜+打邊爐, 搞到我好多年都冇去...), 仲要as request帶埋晴晴去, 對我黎講真係好Q遠, 就算有地鐵都係成粒鐘先到... 今次都唔例外, 晴晴坐車途中瞓著左, 瞓到開席先醒, 好多晴晴爸爸既同事都黎同晴晴say hi, 但晴晴好明顯個樣仲係不在狀態, 10問9唔應, 仲要有另一個同事既"公子"(5歲)係咁走埋黎搵晴晴, 真係好煩呀! 好明顯我唔係好prefer呢類型既男仔做我既女婿囉!! 晴晴用ipad睇緊喜羊羊又走埋黎睇, 仲要挨晒埋黎, 仲要郁手搞晴晴部ipad, 晴晴自己搞佢又唔俾 (真係郁手郁腳!!!) 好心佢既父母唔該教下佢位公子啦, 到搭地鐵時又撞到佢地, 呢位公子仲飛禽大咬咁走埋黎掃晴晴個肚dum!! 真係冇家教呀!!! 今次第一次見我真係毫無防避, touch wood下次仲未被迫黎你估我會唔會仲對佢客氣囉!!

anyway, 晴晴呢一晚既表現尚算唔錯, 又肯自己食野, 到去出去台前逗利是都唔怕羞, 肯講自己叫咩野名同幾多歲, 真係好surprise呀! 仲逗左唔少利是, 當然呢一晚搞到好夜先返到屋企, 晴晴要睇埋Music Station (邊唱邊跳舞) 先肯瞓, 真係暈.....

2014年2月3日 星期一

農曆年假期

今年農厝年要留守香港, 冇得返中山, 舅父舅母同小喬返左中山過年, 真係好悶囉....
基本上家務真係做到冇停手, 慶幸年三十當日突然有得放早, 提早收爐, 拿拿聲去街市買定餸, 買埋手信送禮, 返到屋企開始做埋未完成既大掃除, 洗埋碗, 清理埋個企缸既黑邊, 本來想拎埋張羊仔地毯乾洗點知屋企樓下兩間洗衣鋪已經收爐, 返到婆婆度已經係7點...
食完飯返屋企, 醒起未換壞左既燈泡, 又要走落樓下買, 搞掂後又要洗埋機衫, 等晴晴瞓著左就開始收衫"浪"衫, 掛過年裝飾, 仲有封利是, 一整晚都冇停過手, 真係由年尾忙到年頭囉... 
第二朝年初一, 10點就整醒晴晴, 開始出發拜年, 第一站去晴晴姑婆屋企, 之後再返爺爺嫲嫲屋企拜年, 今年免役唔使入大埔, 所以下晝已經可以返我婆婆度拜年, 是日晴晴逗左唔少利是,每次逗完利是晴晴都會主動俾我地放入佢個企鵝背囊度, 都識得請請講新年快樂
Image
年初一, 換好晒新衫, 但仲要邊食奶邊玩全盒....

年初二, 呢一日都係返柴灣, 但可以唔使太早返去, 煮左飯俾晴晴食左先出發, 出發時入lift見到有人, 晴晴竟然同佢講新年快樂, 仲逗左封利是.... 返到柴灣冇幾耐就俾爺爺抱左出去買玩具 (但盒玩具看來未係好岩晴晴玩囉... =.=) 過程唔多講, 因為唔係太開心 (一來晴晴又跌倒整損左右邊膝頭, 二來唔知點解佢地o的大人個個都係咁, 又要拖但又唔理個小朋友行成點...).... 最後食完飯就返屋企休息, 晴晴回程時o係巴士上瞓著左, 返到屋企仲係咁瞓, 點整都唔醒, 但未沖涼又未洗傷口, 最後唔理咁多除左條襪褲洗傷口太痛, 整醒左晴晴, 當然因為咁唔肯沖涼又扭左一大餐....呢一日既利是進帳都唔少~~
Image
年初二, 臨出門口前好合作地擺埋pose影相

年初三, 是日返我娘家拜年, 晴晴出世到依家都未返過去, 好多野都唔同晒, 又起緊地鐵, 晴晴只係有少少暈車浪, so far都ok, 晴晴又肯跟公公落樓交更, 仲逗左利是, 之後公公載我地返婆婆度, 咁又一日... 是日仍有利是進帳
年初四, 假期既最後一日, 晴晴瞓到11點先醒, 之後食奶換衫, 等埋晴晴婆婆就返晴晴太婆屋企, 是日我要幫我姨寫appraisal... 寫成3x份, 晴晴又不時扭計, 飯又食得唔好, 我又一整日都冇乜點陪晴晴玩, 呢一日假期真係好掃慶... 返到屋企, 晴晴又唔聽話, 唔肯換衫, 除左面衫就周圍走, 最後又打晒噴嚏, 真係暈... 晴晴呢一日咳多左, 緊係啦, 由初一起係咁食腰果同朱古力, 我真係暈得囉....
最後, 初五開工, 要到4月先有假期....

2014年1月2日 星期四

投考幼稚園賽果

唔計將會o係2月interview既幼稚園 (呢一間簡直係神級學校, 俾晴晴玩下, 算係完左自己心願, 但仲未收到interview既信....), 依家總共有4間offer已經留左位, 1間waiting, 兩間有offer冇留位

北角衛理堂 - PM offer
跑馬地寶血- PM offer
北魚懷恩浸信會 - AM offer
杏花村啟思 - PM offer

西灣河明我 - PM offer, 棄權
北角合一堂- AM offer, 考慮中, 但應該唔會留位

大坑真光- waiting

由於晴晴爸爸唔太prefer懷恩, 而我又唔太喜歡啟思, 依家只有衛理堂同寶血考慮, 論地點衛理堂係最好, 近o的, 方便晴晴婆婆, 但我比較喜歡寶血, 雖然中學真係麻麻, 但幼稚園同小學都出名, 不過唔就腳就真, 兩間學校都有申請轉am, 轉唔轉到暫時未知, 已經唔需要擔心晴晴冇書讀 (之前一直都驚冇讀PN既晴晴會冇學校收)

今次唯有交俾幸運之神喇