end of the year

又一年了!

舊年既今日我仲享受緊FTM既生活, 日日煮飯俾晴晴食, 陪晴晴瞓晏覺, 做下家務, 又去下街街

晴晴當時仲係一舊飯咁, 識得坐, 但仲未識得自己由瞓低坐起身, 如果坐坐下瞓左o係度就會大喊叫救命

1月份, 我又要返工了, 日抖要交俾晴晴婆婆照顧, 當然係好唔捨得.... 晴晴都開始學企, 但仲未識行, 呢一年過舊曆年真係好凍

2月份, 晴晴開始學行, 可以扶住櫃, 檯, 牆咁移動, 一個月後成功學行

3-4月份, 開始肯食粥仔, 唔使再獨孤一味食字母粉, 真係開心C我, 突然間追得返晒成長進度, e.g. 識得爬牛牛, 瞓低自己起身, 轉身轉得好smooth (之前一o的都唔識轉身, 人地6個月大要識既野晴晴真係唔識架...), 當然跌親既次數愈來愈多, 變左大冬瓜 =.=

5月份, 唉, 慘囉, 出世以來第一次發燒, 仲要高燒, 燒足個半星期, 支氣管炎, 連生日都冇得大肆慶祝

6月份, 打完針又燒過, 出埋疹, 之後每個月都要燒一燒病一病見見醫生 (真係要身體健康呀!!)

7月份, pat pat紅得好勁, 變左皮膚炎

8月份, 吽牙仔, 不停咬手指, 識得同好close既人做 byebye 動作同飛吻

9月份, 無驚無險, 繼續頑皮倒蛋

10月份, 又病左幾日..... 玩電話玩上癮, 成日要睇喜羊羊先肯食飯食奶...

11月份, 認得晒大部份家庭成員, 識得手指指, 其實應該識得叫人但唔肯講....

12月份, 出世以來第一次腸胃炎, 要轉豆奶.... 打左針, 低燒左兩日

呢一年睇醫生既次數真係多過我去shopping呀, 2013年 onward 要繼續身體健康!!  

打歲半針

約左22號星期六上晝帶晴晴返健康院打針, 一直都以為係10點, 點知, 到臨瞓前拎張針卡出黎睇時先發現係9點鐘, 好彩睇睇, 如果唔係又大件事...

一個星期前腸胃炎發左兩日燒, 而且仲有少少肚疴既情況, 以為唔打得針要再約, 但唔理點都好, 打針前一個星期隔日煲意米水俾晴晴飲, 到打針前兩日就日日飲, 希望打完針唔會發燒/燒得勁

星期六真係比平日好, 今日仲要係特別少大陸bb, 終於都見返香港人bb同父母, 真係好靜, 好快; 晴晴o個朝起身賴床唔肯換衫, 真係差o的遲到, 好彩行一個街口就到, 自己行快少少登記左先, 晴晴婆婆就抱住晴晴行, 都趕得切, 一黎到已經叫名入房磅豬仔...

12kg重, 85.5cm高, 重量比我expect既輕, 可能因為之前腸胃炎輕左, 因為上兩個月去睇醫生時磅都已經有呢個磅數....

姑娘話ok可以打針, 冇燒得可以.... 今次遇到個好好既姑娘 (之前都見過....), 佢好認真咁同晴晴做test, 疊積木, 餵公仔食野, 晴晴都肯做, 真係好彩.... 但講說話就唔得, 姑娘話晴晴識既單字少左o的, 所以足兩歲後要再返健康院check up....

到最後等打針, 今次由我抱實晴晴 (之前都係由晴晴爸爸負責), 打手臂仔, 呢頭除衫o個頭拮完再貼埋紗布都只係幾秒鐘, 晴晴真係一聲都冇喊過, 定係佢都唔知已經打左針.... 打針前姑娘係咁同佢講野, 當時佢都好迷惘咁, 又可能今次負責打針既姑娘手勢好好, 真係快過打針...

頭一日打完針都有食住退燒藥, 所以第一日冇燒, 成晚都冇事, 點知, 第二朝起身就黎料, 好彩最高都係99.4, 食左藥就退返少少, 但都係燒燒地, 夜晚瞓著左又冇晒事, 以為已經捱過左, 點知... 第三日朝早起身又燒返, 不過呢一日就好好多, 食左藥就退, 不過都係要食足一日4次藥....  到第四日就冇晒事lu... 當中有一日我都有煲雪梨意米水俾晴晴飲, 可能真係有幫助掛....

晴晴呢排真係好易發燒, 上個月試過無端端都會發燒, 都唔知食左幾多樽退燒藥.... 真係擔心....

歲半了!!

晴晴19個月大喇, 回顧歲半既bb有咩野唔同先...

身高/體重: 未知, 呢個星期六會返健康院打針, 到時度下就知

牙仔: 上顎對犬齒出左成3個月先見到一半 (由15個月大時發現到依家...), 下顎其中一隻較明顯, 另一隻就淨係見到少少白色

唔知係唔係因為出牙仔, 不停咁咬手指, 仲要10隻手指都咬暈晒, 咬埋o的指甲, 真係激C我, 唔俾佢咬, 就大喊啦, 再瞓埋落地下, 隨時隨地唔高興就瞓地

一係就突然間玩爬牛牛, 隻手污漕, 又咬手, 有乜法唔病... 11月已經發過兩次燒, 呢個月就腸胃炎肚痛肚疴仲發埋燒, 明明退左燒兩日後又突然燒返, 食退燒藥食到好散呀, 慘慘! 係咁出汗呀, 真係閉.....  差唔多一個星期, 都仲係會肚痛同疴爛便便.... 真係唔知點算好, 真係差唔多每個月都要見一見醫生....

咩野都識, 大人講咩佢都知, 但就係唔肯講野, 依家淨係識叫baba, 最近終於肯叫婆婆, 媽媽就唔係成日都講, 一時時

你睇晴晴個樣, 係唔係好似矇矇地咁? 但其實就頑皮到暈..... 依家返到太婆度, 如果表姐唔俾佢玩玩具, 佢就會扁咀喊, 扮晒可憐咁



12月頭帶晴晴出去影聖誕裝飾, 今年有人唔肯影相呀, 仲要拉開個車蓬遮住自己.....

一來扭眼瞓, 二來已經唔肯俾大人話點就點, 真係投晒降....

有好多晚瞓到半夜就醒, 好難先氹到晴晴瞓返, 凍左o個幾晚就好o的, 多數會大覺大瞓到大光, 但有時偶爾會好早起身

小朋友每次病親都會令我好擔心! 真係要身體健康呀~女!

天真 vs 古惑

睇返晴晴細個時既相, 除左以前係肥o的同依家大個左之外, 望起黎總係覺得有o的分別咁

終於, 我諗到, 係表情同眼神都唔同左...

舊年既呢個時候, 晴晴係半歲大, 個樣係儍o的, 笑起上黎好天真無邪

到左依家呢個moment, 就勁古惑

依家幫晴晴影相真係好困難, 以前好易笑, 又唔會捉住你部相機要拎黎玩, 依家每次我一拎迎相機出黎, 晴晴已經要爭黎玩, 而且好難捕捉到佢笑既時候, 一係就成個人走埋黎搶相機...

可能依家個腦袋成日都諗埋o的頑皮百厭野, 所以個人都變得古古惑惑, 雖然個樣同係好baby, 但依家既晴晴已經係有自己意思, 主見既個體, 你想要佢乖乖聽你話真係有難度...

第十七個月

今日晴晴足歲半喇, 咁就18個月大, 真係唔經唔覺, 成日覺得晴晴仲係bb咁, 不過係一個識得周圍走既大bb

舊年既今日, 開始左FTM既生涯 (雖然只係短短兩個多月), 當時朝8點會餵一枝奶 (瞓住黎食), 之後到佢瞓醒 (10點左右) 再餵一枝, 當時既晴晴仲未識得周圍爬, 但已經識得坐, 我就會用好多枕頭同皮圍住佢坐o係大床俾佢自己玩, 又睇下電視, 我就會拿拿聲準備好粥仔同行裝, 搞掂晒就帶晴晴返太婆屋企

o個時個樣就真係超得意, 好肥o者o者, 坐o係地下玩, 但一瞓低左自己就唔識起身, 要求救

回顧下晴晴17個月大既成長...

身高約83cm, 重約26磅, 上顎兩隻犬齒已經出左一半, 下顎就淨係見到一隻, 緊有一隻係墜後....

仍然係三奶兩粥, 粥仔一時時肯食, 有時好乖好快食完, 但有時發脾氣扭計就有排搞, 有時胃口麻麻地, keep住每日都有湯飲

超級野性, 成日要行街街 (多得爺爺成日話要抱佢去睇魚魚, 次次一見到晴晴就會話帶佢去街街.... =.=) 有一次帶佢去公園玩, 仍然唔肯打韆鞦, 但就ok鍾意玩滑梯, 見到有樓梯都肯上上落落, 但玩到夠就要抱/上返私家車, 點氹都唔肯

突然有個喜好, 每次見到爸爸部手機, 都要開黎睇返自己既短片, 真係睇到眼定定, 仲好過睇喜洋洋

開始識得自己既眼耳口鼻o係邊, 但未識講, 見到間房冇開燈, 識得講 "黑mama", 見到我地去完街返屋企洗腳, 就叫 "腳腳", "手手"都知o係邊, 但又係未識講

識得錶錶, bb  (見到自己張poster仲會錫埋去...), mum mum, 爸爸, 爺爺, byebye都好熟, 一見婆婆換衫返屋企就自己識講, 但其實仲未識好多應該要識既單字, 但我又冇迫佢學既意欲, 依家既晴晴應該要識玩, 玩得開心, 咁先係bb仔既工作

真係愈來愈百厭, 專做埋o的高難度動作, 真係一目一驚心, 睇少眼都會出事, 跟到佢實一實先得

做埋好多古靈精怪既表情, 愈來愈扭紋, 見到想要既野得唔到就瞓地, 真係激C我

每個月都要幫襯醫生, 唔係patpat熱, 就係傷風發燒, 一病我就冇覺好瞓, 晴晴就照樣周圍走搵野玩, 未返學已經成日病, 到真係要開始返學都唔敢想像!!

夜晚瞓覺好難先氹得掂, 差唔多要一個鐘先搞得掂, 又唔俾人加被, 一加就成個醒晒扭計, 極度唔熟睡囉

真係愈大愈百厭, 愈大愈唔聽話, 有時我都會發晒脾氣, 真係投晒降

晴晴, 你要快高長大, 身體健康!!

又病左....

剛過去的星期六, 帶了晴晴出去剪頭髮, 係第一次, 出世以來頭髮都係稀疏, 得幾條頭毛, 大大下先開始多少少, 係長左, 不過仲係好少頭髮, 之前由婆婆操刀剪過一次, 係咁二修左前額同髮腳

晴晴呢一日都好扭計, 本來plan住11點半食飯仔, 12點半就瞓晏覺, 瞓到3點就起身食奶再出去, 點知, 正當我想抱晴晴入房瞓覺既時候, 麻麻突然間又走左上黎屋企, 搞到晴晴心又野, 唔肯瞓, 所以到3點半出去, o係巴士上就瞓著左, 瞓到剪完頭髮都仲未醒...

由於有$100 Sogo 券, 想順便帶埋晴晴去買對新鞋仔, 點知, 我真係錯了, 可能我好耐好耐都未試過星期六日去銅鑼灣, 真係多人多到我唔敢想像, 地鐵又迫爆, Sogo更加人多, 亦買唔到心水既鞋仔 (太細隻, 著唔夠一陣又唔岩, 而且款式唔岩心水....), 而且真係好多人病, 唔知係唔係因為咁, 第二日晴晴就發燒喇.....

都係我唔好, 唔應該帶晴晴出去, 唉, 今次一燒就燒到38.2, 帶左晴晴去睇醫生, 醫生話都冇乜唔舒服既病徵, 只係睇到喉嚨有少少紅, 可能都係感冒初起, 唯有食住退燒藥, 但食左藥都只係退左少少, 退唔晒, 食左藥就回落返37.6, 食完藥4個鐘左右又燒返, 因為發燒, 又唔敢晴晴著太多衫, 天氣又涼左, 真係好矛盾.... 到零晨4點幾, 仲燒到38.4, 拿拿聲塞pat pat, 又瞓得唔好, 真係好可憐, 最衰都係我呢個做媽媽, 下次真係行太古城都唔要再出銅鑼灣, 都係留返我自己一個去就算

希望晴晴今日退到燒.....

記事一則

我真係一個好唔小心既媽媽, 話說, 上星期六, 見晴晴不停打噴嚏, 又唔肯食飯, 食食下仲反胃咁連飯連痰咁吐返出黎, 就帶佢睇醫生, 醫生話係好輕微既感冒, 冇乜事, 冇發燒...

睇完醫生, 姨婆先帶晴晴返到屋企, 我就等攞藥, 返到屋企, 我就抱返晴晴入房, 放佢o係床, 之後我就轉身拎片片諗住換, 點知, 只係3秒之間, 就發生意外, 晴晴突然o係床度飛身跌左落地, 仲要係頭先著地, 砰一聲, 仲要係好大聲, 嚇C我, 真係說時遲那時快, 接都接唔住, 晴晴當然係大喊啦, 喊到好大聲, 只能抱返起晴晴攬住佢, 睇下佢有冇流血, 有冇咩野唔妥, 真係好痛呀.... 之後俾左水晴晴飲, 飲完水佢又周圍走搵野玩, calm down左之後換返片片就抱佢瞓晏覺, 擔心左成晚, 又要留意住佢食飯有冇嘔, 有冇其他野有問題, 連夜晚瞓覺我都唔敢熟睡, 成晚起身睇下晴晴有冇嘔, 有冇發燒, 唉, 真係冇諗過咁大個女仲會咁跌落床, 好彩張床離地下唔係好高, 但佢咁飛跌, 又撞得咁大聲, 真係好驚有事.... 而且平時佢係識得自己上落床, 所以今次真係太大意....

第十六個月

唔經唔覺, 今日既晴晴踏入17個月, 回顧下16個月大既晴晴:

出緊上顎兩隻犬齒, 由15個月大時已經發覺晴晴係出緊牙, 但出左成個月, 都仲係得少少牙角突左出黎, 而近期就隱約見到下顎犬齒都有牙包, 可能出牙令牙肉好唔舒服, 晴晴無時無刻都咬手指, 又阻止唔到佢...

平均每日都三奶兩飯 (有時會skip左一餐奶....), 奶都係5-7安一餐, 睇晴晴胃口, 杰粥每餐食到一個大人食飯碗, 有菜有肉, 平均每日都有湯水飲下, 我會盡量煲

身高約81-82cm, 重25磅

10月頭病左一次, 睇左兩次醫生先好, 發左幾日燒, 但冇之前咁嚴重, 一日起兩日止, 但冇幾耐突然又微燒, 食左兩日退燒藥先冇事...

鍾意周圍攀, 攀梳化, 窗台, 去到太婆屋企就要攀床, 睇少眼都唔掂, 成屋走冇時停

已經可以自己行入房閂埋門, 唔驚喎, 玩到咁上下就自己開返門行返出黎

可惜仲未肯叫人, 成日淨係講bb話, 有時同晴晴返緊我突然行開左既時候, 佢先會叫我媽媽... 聽到屋企有開門聲就會叫爸爸, 最叻同婆婆byebye

玩玩具唔係好叻, 好似冇乜心機玩咁, 最鍾意睇喜洋羊卡通片, 食奶食飯都要睇住

每晚瞓覺都好似打場仗咁, 12點前先瞓著, 但對bb黎講太夜喇...

呢個b真係愈來愈百厭, 愈來愈想狠狠咁咬隻豬仔一啖!!!!

記事一則

 平日我返工既時候, 我媽會黎我屋企幫我揍晴晴 (以前我返工前會抱晴晴去我婆婆度, 因我家實在太細, 婆婆家大好多, 我媽就會每朝過去), 到傍晚時候會帶埋晴晴返婆婆度食飯, 而我放左工就會返婆婆度, 依埋飯晴晴又沖埋涼就會一齊返自己屋企... 舅父舅母同婆婆住....

3個月前, 我表哥個細女 (大晴晴一年3個月) 要黎香港住, 因為佢係雙非港人, 大陸有新政策唔俾佢住o係自己屋企, 所以比預期提早黎香港生活, 同我婆婆一齊住, 由舅父照顧

呢個晴晴表姊, 初時都冇乜野, 仲好似好識照顧表妹咁, 點知, 呢個小朋友真係愈來愈百厭, 晴晴依家識行, 好多時會走入去舅父間房, 表姊好唔鍾意, 覺得晴晴霸左佢既地方, 開始同晴晴爭/搶玩具, 仲要推佢落地下, 一係就打佢個頭, 試過晴晴拎左佢個水樽, 佢搶返之後仲用個水樽黎扑晴晴囉.... 但舅父舅母一句說話都冇講過, 我亦都怕舅父會唔高興, 所以唯有著我媽同自己小心睇住晴晴....

當然我媽都唔係咁鍾意去婆婆度, 佢prefer連飯都唔過去食, 佢話餵晴晴食飯既時間仲flexible左... 但晴晴爸就想晴晴可以多o的返去, 俾晴晴出下街, 又可以同表姊玩下...

其實我個心係一半一半, 如果表姊唔係成日蝦晴晴, 我都冇乜所謂, 表姊每次犯完案, 舅父舅母都唔會鬧, 最多都係教佢唔可以蝦表妹....  最慘係每次蝦完唔夠一陣又再蝦過.... 一個兩歲既小朋友, 又點會識得錫住得一歲既bb, 而且好多時唔識得用力, 下下咁對晴晴黎講真係一種傷害...

前晚, 表姊突然間用新招對付晴晴, 就係一手手扯晴晴既頭髮!! 晴晴出世都冇乜頭髮, 到依家先叫做厚返少少, 蓋到頭皮... 當時連我自己都反應唔切, 就咁中招, 大人們就拉開表姊 (但表姊當時仲扯住晴晴既頭髮唔放手).... 過左15分鐘左右, 佢突然間走埋晴晴身邊, 今次係用兩隻手囉! 嚇到我即刻放低晒o的野走埋去, 仲打左晴晴爸一下點解唔幫手, 咁近都唔識得俾反應.... 呢個時候, 我就俾人鬧, 話我緊張, 仲話我過份保護個b, 到時佢返幼稚園既時候仲難適應喎!

我當時好嬲, 我嬲, 係因為我並唔係過份保護, 我相信, 如果表姊既親哥哥咁樣蝦佢既話, 我相信呢班大人係一定會出聲囉... 作為媽媽, 見到自己個小b俾人襲擊, 可以冇反應? 讀幼稚園係3歲既事, 咁晴晴係唔係依家就可以入學? 到晴晴讀小學時, 也許佢已經唔受我既保護啦! 依家明明係個大既蝦個細, 唔教好既話, 呢o的咪就係造成將大後去欺凌弱小? 所以我真係好嬲, 咁樣真係未免太過偏心了.....

第十五個月

15個月大既晴晴, 愈來愈頑皮, 百厭, 唔聽指令, 總有自己既一套, 想法, 要做既野, 一定要做到, 如果唔係就爆喊! 

鍾意爬梳化, 窗台, 開櫃桐, 已經可以推開張網床, 自己走到廚房門口, "裝"下o係廚房既人做緊咩野, 好似玩捉迷藏咁....

一係就要走入廁所, 初初企o係門口, 繼而一隻腳踏入去, o係度賊佬試沙煲咁....

嘗試開門, 要用腳尖企黎掂個門鎖, 試過一拉落黎再推, 咦, 開到喎, 但就嚇親自己, 好驚咁走返出廳... 之後愈試愈滋味....

知道要食奶, 會自己走埋張high chair度想自己爬上去, 但仲未肯自己拎住枝奶黎食, 有時電話響, 我要行開, 佢都肯自己拎住一陣, 見你講完電話, 又會要你拎返

玩玩具, 仲係麻麻地, 鍾意搞到成個廳都係玩具, 但又唔會收拾, 一唔順佢意就發脾氣....

食野方面, 三奶兩飯, 多數都食到7安一餐, 飯 (其實仲係粥仔, 但已經食到比較杰既粥)就食到一餐一個大人食飯碗, 暫時比較喜歡蕃茄魚肉, 盡量每日都會煲湯俾晴晴飲, 一日飲到6-7安既湯, 水果初時都ok鍾意食火龍果同紅提, 點知食左兩日就唔食, 唔知點解, 一唔食o的便便就會好差.. 依家會盡量煲節瓜湯, 可以俾晴晴食節瓜

身高, 大約80cm左右 (次次都唔肯俾我地度....), 體重約23lbs, 同病好之後都係差唔多, 唉, 唯有繼續努力煲多o的湯水俾晴晴飲, 希望幫補一下....

暫時出左12隻牙仔 (前面上下顎加埋8隻, 再加4隻小臼齒), 但仲唔係好肯自己咀嚼, 粥仔既肉唔可以有筋, 一有筋就唔食, 唔食就唔想食, 咁就大獲....

有時我放工返到屋企, 入左房換衫, 晴晴會拉住我件衫拉返我出廳, 唔知點解, 又唔係想我陪佢玩 (因為佢一拉左我戍廳之後又會行左去第二度...), 但我每次一入房, 佢都會咁拉返我走囉....

愈來愈夜瞓!!!! 依家既策略係9點30左右食睡前奶, 10點左右就抱入房換睡衣換片, 再抱落床仔, 睇多一陣電視就迫佢瞓, 但唔係次次都可以11點左右瞓, 每朝9點幾左右起身, 其實真係唔係好夠瞓囉....

行路都行得ok, 但出街多數仲係用揹帶/車仔, 始終人多既地方我唔敢俾佢自己行, 當人唔係太多, 我都會俾晴晴行下, 佢既興奮又緊張, 初時會俾你拖佢隻手行, 但行多兩野佢又會fing甩你隻手唔使你拖, 自己走呀走, 好hyper架

最慘係每星期都跌倒撞親頭仔, 一係前左額撞到個櫃邊, 一係就右前額撞左o係地下, 又瘀又腫, 腫到成隻雞蛋咁.... 真係好痛

呢隻豬仔, 真係好過癮, 成個男仔咁, 邊忽似女仔呀~~~ 

第十四個月

十四個月大既晴晴, 7月中又病左一星期, 由於睇開既醫生放長假, 唯有轉睇另一位經驗豐富既年長醫生, 佢都係出名既兒科醫生, 只係比較遠 (雖然同係北角區, 不過同屋企樓下相比, 要搭車始終都係麻煩o的....)

發燒燒左4日, 轉過藥, 由什麼上呼吸道感染變成氣管炎, 同一個醫生睇左3次都唔太見效 (但退了燒已經很好了...), 咳得好勁, 夜晚訓覺都會咳醒, 仲要食左好多抗生素/消炎藥, 而且冇晒胃口食奶, 連字母粉都唔係太肯食, 輕左兩磅有多, 真係好心痛.... 最後都係要睇返放完長假返黎既醫生先得, 睇左兩次, 好明顯咳少左, 食晒藥已經好返晒

晴晴病既呢後時間, 每日都會煲蕃茄薯仔湯, 用個湯底黎煮字母粉, 希望盡量吸收多o的營養, 之後每日或者隔日都會煲湯俾晴晴飲... 病完之後, 晴晴每餐奶食唔返之前個份量, 之前8安都可以食得晒, 依家7安會食剩1-2安, 之前可以一餐食兩碗杰粥, 依家要分兩餐食, 變左小食多餐咁....  呢個份量同1歲前真係差唔多, 唔瘦就奇啦....

1歲後每個月都睇幾次醫生, 由5月開始, 8月都唔例外, 今次係因為pat pat紅左, 仲要係紅得好嚴重... (其實應該一早就要帶晴晴睇醫生, touch wood以後有咩野事, 自己都要當機立斷...) 醫生話得好比較嚴重既皮膚發炎, 由patpat濕疹+細菌感染, 開左藥膏, 點知用左3日都唔係太見效, 仲有漫延既情況, 又再帶晴晴去睇多次, 今次要食消炎藥先得, 轉左另一隻藥膏, 食同用左3日已經見效, 再加上勤換片片, 已經差唔多好返晒, 真係感謝主....

可能隻豬仔太過百厭, 好多時都會撞親, 唔係手手腳腳, 就係個頭.... 真係見到都淒涼, 次次都喊到好可憐咁...

隻豬仔好似愈來愈唔鍾意訓覺咁, 晚晚冇11點都唔肯訓, 近呢兩個星期係極度扭紋, 之前抱佢o係大床氹佢訓覺, 通常大半個鐘乜都搞掂晒, 大約10點半左右就訓著, 依家完全唔得囉, 日抖都只係肯訓一覺, 仲要係一邊睇電視, 一邊坐o係high chair度, 自己扒左o係度訓先得, 但我自己揍既日子, 我會放佢o係自己張bb床度, 同佢一齊訓 (當然我係呃佢, 仲要扮有鼻寒聲...), 但唔係次次都成功, 有時都要花個幾兩個鐘先搞得掂,  bb咁夜訓真係唔好架, 乖乖地啦女.....

14個月既晴晴:
身高: 約79cm
體重: 約23磅

一日4-5餐, 約3奶2粥 (其實都係視乎佢訓覺訓成點, 有時6點幾鐘餐奶會唔肯食, 有時食得一餐粥 (一碗)已經唔肯食)), 一餐奶大約食5-7安左右, 杰粥就每餐一個食飯碗左右....), 水果最近大愛車厘子, 一見到就大叫mum mum.... 勁興奮囉.... 一日食2-3粒...

飲過既湯水: 蕃茄薯仔湯, 紅蘿蔔粟米湯, 淮山蓮子(有時會落節瓜)

有時會煲果皮米水黎開奶

第12隻牙終於都見影喇, 就係右下顎既小臼齒, 一開口就見到4隻大牙同前面8隻牙 (日日幫佢抺牙仔都俾佢咬到我......)

晴晴要加油!!

第十三個月

上篇提及打完1歲針, 點知, 晴晴兩日後發燒, 最高上到102, 食左一日藥都唔好 (之前食剩用黎看門口既藥), 第二朝就帶左晴晴去屋企樓下個兒科度睇醫生, 醫生話係感冒多過係打針反應, 之後日抖都冇乜事, 一到夜晚又會燒返. 真係擔心到暈, 雖然叫左晴晴婆婆過夜幫手照顧, 但有一晚因為佢既疏忽, 搞到晴晴手腳凍, 得返頭好熱, 真係嚇C我, 所以點都好, 都要自己跟進照顧返, 有時要求人幫自己真係好難... 捱眼瞓就更加辛苦.... 燒左4日開始出疹, 出左差唔多1星期先退左8成....

呢段時候晴晴都肯食奶...

學行進度尚算理想, 初時都唔敢放手行, 係有一日舅父引晴晴由走廊行去廳, 行下行下就冇扶都行到, 依家多數都會用雙手黎做平衡咁行, 真係好得意... 一行就會好開心咁恐龍大叫, 好開心咁

平時鍾意成間屋都要行過先開心, 依家仲要成日入房開櫃, 拎晒o的濕紙巾出黎玩, 玩完又放返入去, 俾佢發現左新大陸....

見到故事書會主動拎黎揭, 但揭兩野就掉落地下, 繼續勁鍾意放任何野入口咬, 勁鍾意o係網床度掉野出黎, 好鍾意同隻大企鵝返摔角, 自己搵玩意

依家都係3奶1粥, 奶食到8安一餐, 粥就食到bb碗3碗, 但唔知點解食極都好似唔長肉咁...  呢個月開始俾牛初乳晴晴試, 希望可以增強晴晴既抵抗力, 一日食一粒, 整碎加入奶, 個味道都唔錯, 晴晴食呢枝奶食得比較快同肯食

第8隻牙 (下顎右邊則門牙) 終於都見影 (又出疹又出牙, 呢次晴晴發燒真係苦過deedee), 每次幫晴晴清潔牙仔既時候都會摸下feel下會唔會有大牙出呢 (初初feel到左邊上下顎各一隻), 原來今次係一次過出3隻呀, 右邊上顎隻小臼齒都出黎喇, 依家晴晴有11隻牙仔喇!!

晴晴加油, 食多o的野, 增肥返呀~~

一歲了!!

晴晴既第一個生日, 仍然係病緊, 仲未好返晒, 但屋企人都想幫晴晴慶祝

條裙仔本來應該係露肩, 但怕晴晴冷親, 所以加左件長袖底衫打底....

睇完影左既相先發現, 原來冇晴晴單人同蛋糕影既相... 真係失策!!

好彩之前健康院冇期, 改到6月頭先打一歲既針, 呢段時間都好緊張晴晴有冇發燒, 有冇唔妥

因為約唔到星期六, 只約到閒日, 唯有請下晝假帶晴晴去打針

磅重有10.8kg, (9個月時係10.69kg), 高約78.5cm (覺得唔係好度得準...), 終於冇再over左條curve, 唉... 但遇上一個勁求其趕收工既姑娘, 係咁問問題就算數, 都冇同晴晴做測試, 又遇上一個打針唔得既姑娘, 之前都試過呢個姑娘未ready好就要我地先捉實晴晴, 搞到佢未打針已經喊定先, 今次都喊, 因為佢真係打得好粗暴, 唔喊就奇.... 打完呢兩枝針, 要mon住兩個星期, 因為其中一枝會o係打針後5-12日先有可能有反應, 但呢3,4日發覺晴晴好似鼻塞塞咁, 最近仲feel到佢好多痰咁, 又即刻去兒科醫生度攞定藥食, 希望唔好又搞到發燒, 呢排盡量都唔好帶晴晴去行街逛百貨公司, 人多而且又係室內, 反而open area仲好, 但都係少接觸為妙, 周街都係傷風感冒人, 就連自己搭車返工都要帶口罩, 怕自己病左又惹到晴晴就大大獲....

病完之後, 晴晴既胃口都唔係一下子就回復正常, 初時唔係好肯食飯, 奶都係由4安開始每日加一安, 最多食到7安一餐, 飯仔就以節瓜/蕃茄/紅蘿蔔+肉碎黎煲, 有時會加少少魚肉俾晴晴食, 上星期冇鼻水既時間連續煲左三日淮山蓮子茨實湯俾晴晴飲, 希望晴晴快o的好返, 好返之後又可以繼續飲湯, 要加油谷返肥隻豬仔同埋抵抗力強o的先得...

最近成日要落地下行, 扶住牆已經行得好快, 有時又會遞高隻手俾你拖住佢行, 又有時可以自己唔扶住快行幾步 (只限短距離), 連網床都唔肯坐.....

牙仲係得7隻, (4上3下), 點解會出得咁怪既....

襯仲有少少印象, 回顧下晴晴既學習進度先...
兩個月 - 掃風時要自己坐起身唔俾大人掃風...
六個月 - 硬頸了! + 學坐
八個月 - 開始坐得穩, 會向後撻落床
十個月 - 識轉身, 扒o係度, 要落地企
十一個月 - 識自己由訓o係度坐起身 (但唔係次次成功), 識爬, 扶住物件移動
十二個月 - 扶住牆mou o係地下, 又會扶住企返起身, 淨係識得叫baba, byebye同飛吻鍾意先做, 又或者過左氣之後先做.... 咁都得....

就快13個月喇, 睇下晴晴幾時真正識得行先~ 

第十一個月

晴晴一下子好似識返好多應該要識做既動作, e.g.訓低起身 (唔係次次得, esp 一朝早起身既時候係要求救...), 碌地沙, 都好似識爬兩野, 但唔太熟練,  玩倒樹蔥, 扶住張檯/梳化企o係身, 要自己行路 (成日以為自己識得行, 但又要大人傍住黎行, 如果唔係就扭大計, 喊...)

看似大個左咁, 有表姊陪佢一齊玩, 但其實係爭野玩多...

依家可以train到晴晴食7-8安奶一餐, 3奶1飯, 依家要帶左晴晴返太婆度先肯食奶, 一來已經唔鍾意訓著覺食奶, 二來一抱起晴晴既時候都會整醒左佢, 依家每朝同佢換片換衫都可以整醒佢, 但又會扭大計, 因為話我地好阻住佢訓覺....

重23磅左右, 身長77cm, 7隻牙仔 (上4隻下3隻), 冇乜點咬人, 但清潔牙仔時都會俾晴晴大大力咁咬住, 都幾痛

本來打算幫晴晴開第一個生日會, 點知, 去完studio影相之後就病左好多日, 發高燒, 燒左3日, 之後就係低溫燒, 足足10日先穩定返, 呢段時間食奶量急跌, 唔肯食飯仔, 每日3次都要食5,6,7枝藥水, 每次餵藥都會喊餐飽, 食藥食到反胃又會嘔, 嘔左好多次, 一嘔就嘔左好多痰出黎, 只能食4安奶一餐

呢10日真係令我寢食不安, 每當食/用藥後退了燒, 但轉個頭藥力過左又燒過, 頭3日燒到102.8度, 之後keep住100.5度, 食左藥就去返99.4-5度, 每日零晨4點幾開始又燒過, 晴晴瘦左成個圈, 本來已經唔肥既晴晴愈來愈瘦, 得返條幼幼既頸, 真係心痛到暈.....

我後悔自己冇考慮清楚就帶晴晴去一o的高危既地方, 最後仲整病埋, 一燒燒咁多日.... 往後一定會更加小心, 好好咁保護晴晴....

第十個月

話咁快就10個月大, 依家既晴晴, 食量唔算多, 最多食7安一餐, 但一早同最夜o個餐都係食3-5安左右

其他進度好似突然間一下子追返好多, e.g. 終於識得翻身, 成日都要企地下 (但腳仔同手仔仲未夠力可以自己一個人支撐身體, 多數要大人傍住....)

突然間又肯食返粥仔, 之前一直都係煮字母粉, 依家多數都係食蕃茄肉碎粥, 會再試煮其他新既食物

健康院本書仔真係好好用, 本菜譜俾左好多啟發!!

開始識得發脾氣, 佢要既東西你唔俾佢做/到手, 佢就會wu你, 之後再唔得就會爆喊....

識得用手拎星星餅食, 但唔係次次得

身高大約係76cm, 重大約22lbs左右 (唔多準確, 因為係好roughly咁計)

突然間又爆多左一隻牙仔出黎, 今次係左邊上顎既側門牙, 另一邊看似爆緊但又未見影.... 成日收埋晒o的牙唔俾人睇, 夾硬要睇佢就發老脾....

快o的識行就好喇, 豬仔~

第九個月

9個月大既晴晴, 因為之前半歲打針去健康院時姑娘覺得佢對腳仔唔係好夠力, 所以要佢1歲打針前要返多次健康院做成長評估...

高75cm, 重10.69kg

識得用手拎星星餅食, 識得坐, 識得有eye-contact, 俾晴晴試企地下, 前面有張椅俾佢試用手扶住, 我以為唔得, 因為佢o係屋企係未試過可以咁做到, 點知都企到一陣陣, 係自己一個人用手扶住咁企... 所以姑娘就話ok啦, 1歲再返健康院就要識得咁樣做....

上顎門牙終於都有影喇, 一隻長o的一隻短o的

滿9個月, 開始試俾字母粉晴晴試, 佢又ok肯喎, 同要佢食粥仔個樣差好遠... 所以, 決定以後日日都食一餐字母粉

奶都係3-7安一餐, 一定要有玩具俾佢玩先肯食, 如果唔係就點都唔制....

o的曳野開始出喇!!

第八個月

8個月大既晴晴, 愈來愈扭紋, 每次扭眼訓, 多數要用揹帶揹住先肯訓, 開始對其他小朋友好奇, 又會睥住身邊既人 (esp. 陌生人...), 好搞笑...

突然間唔肯食粥仔, 淨係食奶... 但都鍾意食大人飯, 我地開飯時, 又會俾幾啖佢咬下咁....

半夜都會訓1-2次, 要baba好辛苦咁氹先訓得返, 有時仲會明明9點幾訓著左, 到半夜兩點幾醒左爆喊唔肯訓 (但明明係眼訓到平衡唔到個人...), 又係唯有揹住訓....

仍然係得下顎兩隻牙仔, 仲未出其他牙....

其他都仲係咁, 唔識爬, 訓左o係度要人幫先識得坐o係身, 坐o係度玩都仲ok, 唔會周身郁 (暫時), 但有時都會成個大冬瓜咁跌左落地下又唔識起返身, 呢個時候就會大聲叫救命

唔通我個b發展遲緩???