2013年4月26日 星期五

第廿三個月


踏入第廿三個月不久, 晴晴就病左...

初時只係普通感冒, 食緊藥, 突然間半夜發燒, 再睇醫生, 喉嚨發炎加氣管敏感, 食左退燒藥仍然唔多退燒, 晴晴又比較扭計, 一喊, 就嘔...  尋晚就漏夜換床單同幫晴晴沖涼, 收拾整污漕左既床單, 公仔, 仲要說服晴晴公仔污漕左要沖涼先有得陪佢玩, 但有時佢都會扭計, 點都要搵返晒o的公仔朋友

最後搞到零晨兩點晴晴先瞓著, 可能燒得辛苦, 靜靜雞貼左塊退熱貼又冇反抗, 點知到6點半左右因為再燒而醒左, 一醒左就要搣左塊退熱貼, 之後又話要出廳wee wee, 又搞左一輪, 晴晴只係瞓左4個鐘, 平時佢冇10點都唔會起身, 成對panda eyes走晒出黎, 真係慘慘豬...

今日已經係發燒既第二日, 可能係朝早幫晴晴塞左半粒pat pat, 所以燒明顯地退左少少, 但過後又上返101, 醫生有講係要等o的菌冇晒先唔會再燒, 真係唔知要等幾耐, 就連藥都有6枝, 真係食到晴晴反晒胃, 真係食藥食到嘔... 轉左隻消炎藥, 希望快o的好返啦....

唔食得奶, 唯有食豆奶, 其實之前腸胃炎時都有食左一罐, 點知今日就唔肯食, 話甜囉!! 但平時隻3號仔又會令晴晴咳同起痰, 唯有開稀少少, 但都唔係食得晒, 真係好心痛呀, 個面豬o的肉幾乎瘦晒, 一枝奶既影響真係好大

希望晴晴快o的好返啦, 唔夠瞓事少, 晴晴健康事大!! 又要準備好返後用米水開奶一段時間 + 淮山蓮子湯攻勢先得....

2013年4月2日 星期二

復活節假期 - 1


復活節有4天假期, 婆婆返左中山hea, 我就要留守大本營, 做足4日full time mum, 4日裡面晴晴爸爸有兩日要返工, 點知佢放假既時間反而係我最痛苦既日子...

事關, 佢都係一個大細路...

星期六 - 晴晴瞓到11點先醒, 不斷賴床, 唔係唔肯起身, 而係點都要企o係窗前面睇雀仔, 睇到夠就自己走出廳... 好彩都肯食早飯

食完早飯, 又同晴晴玩, 玩左一輪又係時候夠鐘瞓晏覺, 食完奶當然唔肯入房, 入到房又扭計唔肯瞓, 拉鋸左1小時, 我開門行出廳裝枝水俾晴晴飲, 點知佢一見我開門, 真係快快手走左出廳坐左o係自己張梳化仔度睇電視, 連行雷都唔驚囉... 當時見到佢呢下, 我真係唔知應該好嬲定好笑.... 到飲完枝水, 又繼續打仗, 到後係我投降, 因為已經夠鐘食第二餐飯....

餵呢餐飯就慘囉... 食一啖又吐一啖, 其實晴晴唔鍾意食有口感既肉碎, 所以整肉餅都要整得淋身o的, 點知都俾佢reject... 好彩到最都食得晒, 今日煲雪梨蘋果, 出奇地自己要求encore要加加, 所以真係super happy, 玩到咁上下, 晴晴爸爸就放工返屋企... 晴晴每次聽到開門聲, 都會走埋去推返埋度門, 唔俾人入屋架, 今次都係, 最慘係出面落大雨, 晴晴爸爸都濕身...  之後食完奶, 晴晴爸爸搣左個橙俾晴晴食, 點知食食下....


仲以為晴晴呢覺可以瞓到天光, 而我終於都有餐宵夜可以食下, 點知.... 瞓到12點幾, 醒左... 擾攘左一輪, 起身食左5安奶, 點知都唔肯瞓, 又扭大計, 又係咁打噴嚏, 當時我都火到想打人, 最後咪唯有由得佢自己o係床仔扭計扭到瞓返.... 呢一日, 真係人都癲...