晴晴生活日誌: 5月 2011

2011年5月19日星期四

返屋企喇!

頭尾住左4日醫院, 第4日出得院返屋企.... 醫生問我要唔要住多幾日, 真係多謝晒, 成間房都係大陸人, 仲要當間房係酒店, 佢地生完仲可以晚晚開大大聲睇電視, 唔通真係唔使訓唔使休息... 所以走得都走, 最想快快手抱b返屋企....

等左好耐, 等醫生巡完晒房再等會計部出單, 到找晒數拎住張單去bb房"提貨", 真係花好長好長時間, 等呀等, 終於都叫我個名, 入到去, bb已經著好晒我帶俾佢既衫 (o的衫好大件, 連張包被又好似勁大張咁...@@"), 姑娘交帶埋呢幾日bb食左幾多安奶, 幾時餵過奶, 同俾晒所有bb既資料我, 就抱俾我帶返屋企....

返到屋企, 陪月姨姨已經煮好飯俾我, 放低b落床仔後, 我就食飯, 陪月姨姨就開始照顧bb, 好彩係第一日, o的長老個個都返晒自己屋企, 我終於都有得抖下...

bb返到屋企飲既第一餐奶飲到3安, 好開心! 而且成日訓, 冇乜點醒, 一到除衫沖涼就喊得好淒涼, 真係慘....

而我媽由今日開始會黎我屋企住, 幫手照顧bb...

ZZzzzzZZZzzzzz~~~

爸爸既倒模~~

第二朝好早就醒左, 好多個嬸嬸推左車入左黎做清潔, 其中一個黎想幫我抹面抹身, 我驚到即刻話唔使, 淨係俾水我飲就得 =.=

冇幾耐我爸都黎左睇我, 佢應該係剛交更, 又黎睇下bb, 因為bb出世o個時已經過左探b時間, 而且剛出世又要訓4個鐘暖箱, 基本上除左老公見過個b之外 (老公o係手術室門口等我, 見到姑娘抱住剛出世既b出黎, 佢就一齊跟埋去產房度, 佢話, o係架lift度o個時bb有開過眼望一望佢喎....), 未有人見過....

之後老公又黎左, 當時已經差唔多10點, 可以睇b, 但我未落得床, 所以叫佢影相俾我睇...

咦, 點解個頭仔後面咁厚既?! 嘩, 個樣同老公一模一樣!!! 仲要係咁訓.... =.=

又唔知過左幾耐, 有個姑娘推住架bb車入黎, 原來係帶bb俾我睇呀!!!! 仲可以抱住tim!!! 當時個感覺係, 咦, 咁cool既? 一眼都唔望下我, 淨係訓.... 抱左都唔夠一陣又俾姑娘帶返去育嬰房...

過左一陣, 醫生黎巡房, 話等除左尿袋就可以落床行下, 仲可以去育嬰房餵奶tim! 但我都等左好耐好耐先有姑娘黎幫我搞掂, 等到差唔多下晝先有得去餵奶, 一日4次; 入到去, check手帶, 等左一陣姑娘就抱左我個b出黎, 一睇就佢呢個係我個女, 一定唔會搞錯.... 望住佢就好似望住老公一樣!!! 跟手姑娘就俾左枝奶我, 好似之前都有餵過bb飲奶, 就膽粗粗咁落手... 仲"託"住bb個下巴掃風.... o個下真係驚驚... 試多一兩次又冇乜野, bb有時食到唔停, 有時食少少就頂返出黎唔食, 真係估佢唔到

另外每晚7點鐘都係親子時間, 爸爸媽媽可以一齊入去同bb玩 (玩咩丫, 其實咪又係抱b影相又欣賞...)

如是者, 4日3夜既時間就係咁過去, 每朝7點起身等食早餐之後去餵奶, last一日就係等醫生巡完房交單俾accounts計數, 等找數先可以一手交一手換返個人仔俾我地....

承為 $6x,xxx大元~~~ =.=

2011年5月16日星期一

出世喇 (Part 1)

臨天光時份先入醫院, 真係好冷清, 冷氣好凍, 又冇乜人, 最衰就係唔記得同姑娘講唔要同一陸人一間房, 因為當時我淨係諗住幾時生B....

做左好簡單既檢查, 開左1度, (心諗, 咦, 最遲下晝3點幾應該生完啦...), 點知血壓高...

姑娘係咁問我之前做產檢既時候係唔係咁架, 我話唔係喎, 次次都好正常架... 之後就安排我入病房, 因為當時未夠6點, 最早都要9點先有得入病房陪住, 所以老公就o係出面大堂等, 當時我又凍又痛又唔舒服, feel到o的水仲係咁流, 搞到成件衫都濕左大半, 感覺好唔舒服... 訓下等下, 大約15分鐘左右又痛一次, 心諗, 幾時先等到醫生黎睇我架....

終於捱到9點幾, 老公買左早餐黎, 但我真係食唔落, 心諗, 如果真係要開刀, 就更加唔食得野, 一邊睇NBA Play-Off, 希望分散精神, 等到10點幾, 醫生終於都到, 要行出去護士站做檢查, 心諗, 都痛左5粒鐘, 應該都開到3-4度掛, 點知....真係晴天霹靂, 醫生話只係開左2度, B個頭仔同係好高... 下, 唔係呀, 咁點算呀... 之後就安排左我入產房等同埋駁機, 醫生話佢下晝會再黎睇下我... 入到產房冇耐, 都仲可以有心機睇電視, 又同老公傾下計, 點知已經愈來愈痛... 痛到出唔到聲, 都只係開左3度, 姑娘叫我不如打止痛針啦, 因為我辛苦時BB都會辛苦, 而且應該仲有排先生得, 叫我打左針休息下好過.... 不過打左針又真係冇咁痛, 而且仲訓著左....

訓到暈暈地既時候, 醫生黎左, 睇完o的數據, 都話仲有排, 再幫我落催生藥, 再等到今晚睇下點.... (救命呀...!!)

出世喇 (Part 2)

入左產房之後, 駁埋機, 老公陪住, 愈來愈痛, 差o的連行都行唔到, 腳冇晒力咁, 睇電視都冇晒心機, 姑娘見我痛到冇晒表情, 叫我打止痛針, 話唔痛係生唔到b, 而且我痛既時候bb一樣都會好辛苦, 有排都未生得, 打枝針訓下抖下好過, 打完針之後真係訓著左, 雖然痛但感覺上已經relief左好多, 訓下訓咁又見到醫生黎睇我, 見我都係開得唔多, 就開始落藥催生, 話點都會今日內生b, 因為穿左水廿四小時內都仲係安全既... 到醫生走左之後, 已經痛到頂唔順, 又feel到BB好似係咁頂出黎, 姑娘每次check完, 都係話, 痛到最勁既時候只係開得5度, 唔係大痛既時候得返3度, 真係救晒命, 如事者, 痛到下晝5點幾, 剛好穿左水已經12個鐘, 自己好驚bb會有事, 又郁少左, 聞左唔知幾多樽笑氣都冇用 (聞完個人係wing, 但一樣係痛....), 最後都係揀開刀, 好彩排到7點鐘有位, 如果唔係, 就要等到夜晚11點先再有手術室... (心諗, 到時可能都唔使用, 因為應該都會生左喇啩.....)

姑娘推我去緊手術室, 不斷有人問我叫咩野名, 幾歲, id card number, 仲要係問左3-4次, 真係痛到冇力冇氣去答, 入到去, 仲要等醫生到, 當時我痛到同姑娘講, 不如你一野打暈我算啦....姑娘就話唔得呀, 一定要等醫生到先可以開始, 會對bb有危險咁.... 等呀等, 等到終於聽到醫生把聲, 心諗, 唉, 終於都甩難喇....

由訓著到有返知覺, feel到係有人同我著緊褲, 慢慢都開始醒, 姑娘推我出手術室冇耐就見到老公等緊我....其實已經唔係好記得問過佢o的乜野, 淨係知佢幫唔到我影bb出世既第一個樣, 因為我部iphone已經冇晒電.... (!@#$$%^), 所以, bb出世成晚我都未見過.... 生完返到番自己張床已經係7點幾8點, 講唔到野, 淨係feel到個肚細左, 訓到半夜醒左, 好暈, 唔知個bb咩野樣...淨係知bb有7磅6安士重, 真係嚇我一跳, 之前產檢醫生估計都係頂多7磅啦咁.... 咁自己重左40磅都係值得既....

成個過程, 淨係得個痛字, 好可惜唔能夠第一眼見到自己個女出世個樣係點....

wk40 & 4days

呢兩三日行路既時候覺得左邊恥骨好痛, 每行一步都痛到入心入肺, 行得好辛苦, 不過都頂硬上, 仲要行多o的樓梯, 要老公o係後面撐住我條腰先行到...

今晚食完飯去toilet既時候發現有少少好似jelly texture既分泌秘, 心諗, 唔通就快生得? 都有同老公講, 佢都話要擺定個走佬袋o係門口, check清楚有冇漏, 一陣間真係半夜生得就大獲喇....

差唔多成點鐘先訓, 訓訓下, 大約兩點半鐘到, 覺得急小便要去toilet, 都冇乜事, 再訓啦, 點知訓左一陣, 大概係5點鐘左右, 發緊夢既我突然feel到好似有野流出黎咁, 以為自己賴左少少尿, 點知當我想起身既時候, 水突然係咁不斷流出黎, 原來我真係穿左水呀!! 即刻拍醒訓到成隻豬既老公, 一邊拍佢一邊話, 我穿左水呀... 佢一聽到就成個彈左起身, 我就拿拿聲換褲換衫, 已經沖唔切涼, 因為穿左水, 等老公一齊出門口既時候, 已經feel到開始痛, 大概每15分鐘就痛一次..

落到街, 咁岩係交更時份, 落到街好冷清, 真係一架的士都冇呀... 行多兩步見到有架的士拍左o係路邊, 個司機仲訓緊覺, 老公就敲佢玻璃問下去唔去醫院啦, 個司機又ok, 就跳左上車, 15分鐘左右已經到左醫院. 其實車費只係$30左右, 但我老公就俾左$100佢唔使找, 佢話拍我整濕人地架車個seat位.... =.=

入到醫院, 做登記同埋初步檢查, 開左1度, 姑娘都有打俾醫生, 因為我話想試順產, 所以之後已經帶左我入病房