2013年10月28日 星期一

幼稚園K1 offer

上星期五請左半日假去左跑馬地聖瑪加利大交表, 呢間都係出名既幼稚園, 而且好難入, 如果係天主教徒會優先.... 去到都冇乜人, 唔使點等, 15分鐘唔使就搞掂, 11月30號上晝10:45, 都好, 唔使太早

同一日既下晝收到啟思既email, 收左晴晴讀 k1 下午班, 老公話照留左位先, 試下申請轉返上午班 (其實我填左淨係申請上午班架咋....)

anyway, 自己prefer俾晴晴讀上午班, 時間好用o的, 晴晴又可以瞓下午睡, 雖然黎緊11月都有好多interview, 但以晴晴既表現黎睇, 其他學校offer到上午班既機會真係唔太大.... 可能啟思下午班真係個大水泡...

以下係晴晴黎緊既interview schedule:

1/11  懷恩浸信會 / 迦南 (2揀1, 撞左時間)
2/11  寶血 / 嶺南 (2揀1, 時間太接近)
9/11  明我 / 玫瑰崗 / 明慧 (可去兩間)
16/11 衛理堂
23/11 合一堂 / 上書房 (可能揀上書房in)
30/11  聖瑪加利大
7/12    真光

應該點都會有一間俾到上午班offer卦...  真係唔知, 原來interview表現真係咁緊要.....

2013年10月22日 星期二

2歲5個月

呢個月仍然忙為晴晴報幼稚園, 有好幾間又係要親身去交form

其實咁樣係好處, 自己去一次先, 下次要帶晴晴去interview時都知點樣去, 有個心理準備

數一數, 原來已經報左10幾間, 除左有一間未收到interview信之外, 所有既application都收齊晒interview letters, 有兩間要星期五in, 仲有同日同時間既仲勁多, 好多日都要2選1, 依家係揀唔到去合一堂好, 定上書房好, 兩間都各有各好, 論地點, 合一堂會近o的, 論reputation, 上書房勁o的, 真係好難揀

晴晴上星期又大傷風, 可能係我上星期日同佢著左件薄既長袖衫焗親, 見佢不停打噴嚏流鼻水真係心都痛埋, 睇左兩次醫生, 考慮緊應唔應該帶晴晴打流感針..... 11月係interview既高峰期

晴晴真係愈來愈曳曳!  依家仲會同表姐互片, 真係唔講得笑, 見佢兩個有玩又玩得好開心, 有時表姐又會好好人咁讓晴晴, 但有時又突然間咩野都唔俾晴晴玩, 所以每一次臨返屋企前都係互片收場, 急急腳 "冇鞋挽屐走"


報K1要準備照片,  影左3次, 暫時以第3次o個張相得最好, 好難得晴晴肯交戲笑俾我地睇!!

下顎出左兩隻大臼齒 (終於都出晒), 仲差上顎兩隻, 呢期幫晴晴刷牙時都會望下有冇出, 但晴晴唔係咁合作, (係做乜都愈來愈玩野.....)

最近冇乜點幫晴晴度高磅重, 感覺好似成半年都冇乜點重過咁... 唔係病就唔肯食野, 一係每次食飯都要花上個幾兩粒鐘, 真係食到凍晒.... 高度都係咁上下, 同半年前差唔多, 舊年既衫都仲岩著, 所以今年夏天都冇乜點買新衫...

所以, 千祈唔好話o的baby肥, 晴晴bb時既baby fat真係會消磨晒架... 

2013年10月7日 星期一

晴晴幼稚園interview - 第一仗

9月份晴晴病左兩次, 第一次只係發燒, 相隔5日又再燒過, 氣管炎, 中秋都係病病中渡過, 冇帶晴晴去屋企平台度玩燈籠, 唯有自己屋企掛

9月份報左好多間幼稚園, 10間左右, 最近開始收到安排interview既信同email, 啟思真係勁, 呢間幼稚園係唯一一間唔需要大量相片, 回郵信相, 出世紙&針卡副本, 只需要做web submission, 相同出世紙只需要attach上去就搞掂, 連收interview通知都係email

10月5日係晴晴第一個interview, 去杏花村啟思, 10點, 平時晴晴冇10點都唔起身, 呢一日8點半就要叫醒好夢正酣既晴晴真係好慘, 可幸氹兩野已經自己起身走左出廳睇電視, 飲奶都只係用左半粒鐘, 換片換衫出得門口已經係9點20分... plan定出發會坐的士, 點知落到街等左好耐都冇車, 等左10分鐘先有車, 上到車, 冇幾耐晴晴就話驚驚, 都唔知佢係因為驚呢個司機開車開到舞龍咁, 定係因為上幾個月每朝都搭的士返醫院而驚, 所以成個人都好定又好靜..... 以為坐的士去應該冇乜問題, 點知個司機又唔熟路, 我又搞錯左地方, 去左上書房囉竟然, 晴晴婆婆拖住晴晴, 我又周圍問人, 原來兩間學校係天各一方囉!  啟思o係另一邊平台, 又要帶住晴晴快走, 因為信上寫明9點45分到, 我地去到杏花村時已經係9點40分...

千辛萬苦搵到間學校, 條龍真係排得好長, 問下已經排緊隊既家長, 大部份都係10鐘等interview, 亦有超多操普通話既家長, 估唔到雙非唔單止入侵北區, 就連港島東區都已經被侵佔, 我地仲排正o係個不斷咳又唔遮口既雙非父親後面, 真係超級驚嚇!!!!! 後兩個又係雙非, 真係好多好多囉....

其間晴晴已經講左好多句話要返屋企, 我地唯有keep住氹晴晴, 抱下佢, 又傾下計, 同佢講我地等緊返學....

咁岩排我地後面既媽媽帶住姐姐同個女見K1, 呢個媽媽既諗法同我一模一樣囉... 佢個女細晴晴一個月 (但身型差唔多呀!! 所以唔好話晴晴高, 佢只係一般), 媽媽又係想等小朋友3歲大抵抗力好o的先開始返學 (所以又係冇讀N班), 但小朋友已經識得自己去potty喇 (晴晴真係要好好加油....)

等左好耐 (冇睇錶), 可以開始入去學校, 但只能夠一位家長陪同(婆婆本來o係出面等我地, 點知佢個裝修師傅早到, 佢又要即刻趕返香港仔, 唯有叫姨婆黎等我地, 晴晴當時未知),  reception就係學校門口, 入學校時要交電郵hardcopy同$30報名費, 同埋俾左兩張紙家長 (當時冇時間睇, 事後先知一張係收據而另一張就係面試流程同注意事項),  就可以入去指定既課室 (我地同小朋友被分派到唔同課室, 冇得一齊interview)

入到去, 已經有幾pair小朋友同家長o係入面, 亦有一位老師同小朋友做緊interview, 我地入到去搵位坐, 小朋友就可以玩檯上面已經放好既玩具 (咁岩檯上面係晴晴平時有玩開既入形狀玩具), 晴晴玩左好耐, 當隔離有小朋友叫, 喊, 有任何風吹草動, 8卦妹都會轉頭望下, 有個小朋友in緊時突然爆喊, 晴晴望到眼定定 (好彩冇跟住喊), 玩到咁上下, 排隊時排o係我地前面個雙非母子坐左o係我地對面(佢應該係11點o個批, 好明顯係以為早到早in), 佢個小朋友, 男仔, 係咁流鼻水, 但個媽媽竟然可以冇幫佢抹囉!! 晴晴玩緊既玩具佢仲要拎黎玩 (人地就算坐滿一檯都係各自玩自己既玩具!!), 算喇, 俾佢, 點知呢個男仔突然打左個噴嚏, 嘩, 真係嚇C我... 之後佢見呢張檯冇乜玩具玩, 就轉隔離張檯度玩, 玩玩下最後都走左出playground (好彩.....)

初時以為要等好耐, 以為要等到前過我地入班房既小朋友先到我地, 點知前過我地既小朋友都未in就到我地, 老師搵有冇晴晴呀, 我就問邊個晴晴呀, 有好多個晴晴喎(因為呢幾年出世既小朋友好多都叫晴晴架!!), reconfirm一次到我地喇, 老師行到埋黎, 同晴晴講早晨, 但晴晴只係眼定定望住個老師, 氹左一陣先好細聲咁講返句早晨 (唉...)

講完早晨, 首先叫晴晴玩疊高o的兜兜, 初時晴晴唔知想點, 要老師示範第一個點放, 佢先識得玩, 疊完高之後就放返晒o係檯面度, 再由大至細咁疊埋一齊, 人之福晴晴唔係好做得到), 之後老師加返個蓋, 叫晴晴入形狀 (點知晴晴可以已經玩到好厭, 有理冇理放得入就算, 冇跟形狀囉), 入到咁上下, 晴晴見放唔入, 就不斷咁搵隻手推落o的, 過左一陣老師先見到兜兜裡面已經放左好多玩具, 先拎返o的出黎再俾晴晴玩, 但晴晴已經玩到冇乜心機... 之後, 老師話, 呀, 晴晴, 應該都好口渴喇, 不如飲水囉, 就o係個玩具欖度搵左個茶杯同茶壺出黎, 點知, 晴晴打開個茶壺蓋, 望一望就同老師講, "冇水喔..." 我同個老師呆左, 老師邊加返個蓋邊話, "有架, 有水架", 並示範一次俾晴晴睇 (唉.. 又要示範), 到晴晴玩時, 佢堅持要拎開個茶壺蓋, 倒水, 自己飲, 老師再叫佢倒杯水俾媽媽飲, 晴晴都冇咁做, 淨係俾自己飲, 做左3次.... (唉...), 再之後, 老師拎左本布書仔出黎, 叫晴晴揭, 又抽問晴晴某幾個 (褲, 衫, 波波), 最後, 老師拎左個有唔同顏色同圖形既板, 叫晴晴放返岩既位置, 之後老師叫晴晴俾個三角形佢, 又叫晴晴俾個紅色佢 (好衰唔衰個紅色似啡色, 橙色似紅色, 又衰左...), 再俾個綠色佢, 玩完晒, 點知晴晴仲想o係個玩具欖度拎玩具 (佢想拎本書仔), 老師先話玩晒喇, 唔玩喇, 之後就俾左兩個貼紙佢, 叫佢貼莒件衫就, 成個interview完晒....

行出班房, 晴晴仲未想走, 佢見到個mini playground係咁周圍行 (地方陌生, 但又想玩), 最後佢玩左個mini滑梯, 再玩埋個mini過山車, 玩左幾轉, 最後我話我地要返屋企喇, 婆婆等緊我地架.... 晴晴先肯走咋, 點知, 行到出去, 見到既唔係婆婆, 係咦姨婆, 晴晴成個人都down晒, 好失望 (晴晴最近夜晚都要搵婆婆.....) 行返去地鐵站搭地鐵返屋企, 行行下佢自己話, "婆婆走左呀...." 咁.... 真係O晒嘴囉....

晴晴依家覺得返學好開心, 好好玩, 下一個interview暫時係10月26日既民生, 8點50分!!!! 雖然近, 但都要行, 咁, 晴晴應該要幾點起身好????