K1家長會

24號星期六係晴晴學校家長會, 仲要係一早8:30, 本來想同埋晴晴爸爸一齊去, 但因為婆婆屋企搬屋, 晴晴又唔會咁早起身, 唯有留低佢地兩個大覺瞓, 自己一個人一早上學校

好準時去到, 仲o係學校附近遇到晴晴班既其中一個老師

去到班房, 原來我都唔係最早個slot, 仲有一個比我更早

到見時, 老師俾左晴晴平時上堂做既習作我睇, 做左3頁, 都係連線同埋填顏色, 老師話晴晴都可以o係指定時間內完成, 其餘都係話晴晴講野唔太清楚, advice我搵言語治療師睇下 (等學校referral), 同埋話晴晴走路時成日跌下跌下咁, 大肌肉唔夠力, 我諗都係要時間, 晴晴呢方面係比較慢, 平衡力麻麻, 我自己覺得係需要時間, 希望老師唔好push得佢咁緊要

其實自己一直都冇俾壓力晴晴, 只要求晴晴識得乾淨同污漕, 懂自理, 其他方面, 就算係讀書, 自己都唔希望俾壓力佢, 只希望佢可以自己自由發展

家長會就係咁完左, 冇乜特別

大喊包

尋日一揍二, 住隔離既表姐一聽到晴晴起身已經拍門要黎玩, 兩個小朋友係就係玩得不亦樂乎, 但要嘈起上黎都好大獲, 唔係大家玩既野唔一樣 (晴晴係都要表姐陪佢玩同一樣既野, 但表姐玩兩野已經想玩第二樣, 晴晴又唔制...), 就係大家爭同一樣既玩具玩, 唔係同顏色既積木, 就係煮飯仔同一隻煎pan... 到lunch時各自返屋企食飯, 表姐唔係好想走, 晴晴突然講左一句, "你阻住晴晴食飯喇...."  O晒嘴

到食完飯表姐又過左黎玩, 今次玩玩下仲開拖, 用積木互片, 總之就係嘈到飛起, 當然呢一整日晴晴都喊左好多次, 每一次唔鍾意就喊

到黃昏要沖涼時又唔聽我話, 俾我鬧, 但仲要俾佢打左一下, o個一下真係嬲到出晒煙, 但冇再同佢嘈, 亦冇再打返佢, 係唔睬佢, 搞掂晒抱返佢出廳我就沒收晒所有玩具, 當然晴晴又喊過, 但我一直冇理到佢, 喊到由toilet出返廳都仲係喊, 喊到婆婆返黎食飯因為呢個大靠山返左黎而收晒聲仲唔理我tim

好啦, 都夜晚o係隔離食完飯, 要交換禮物, 拎到返屋企已經第一時間要我拆晒俾佢玩, 但佢仍然心思思放左o係聖誕樹o個份禮物, 佢以為當送左俾表姐o個份送走左既時候佢亦都可以拆埋自己o個份, 但因為當時已經夜, 而且睇得佢係好眼瞓, 本打算一返到屋企就俾奶佢飲後就夾佢入房瞓, 所以點都唔俾佢咁做, 佢就一直喊, 喊到唔肯收聲, 有時喊到累要抖一抖就玩同表姐交換返黎o個set Lego, 玩到咁上下抖夠又大喊過, 前前後後已經喊左5,6,7,8次, 到最後爸爸放到工返黎就自動收聲, 因為佢知道爸爸講過唔會俾佢提早拆禮物

到最後臨瞓前晴晴係喊到雙眼腫晒.....而且已經攰到放盡晒電, 所以好快就瞓著左, 點知瞓唔夠一粒鐘就發惡夢喊醒左, 又爆喊過, 點氹都唔收聲, 乜都扭, 又係要爸爸收拾殘局

日抖喊得多真係好大獲, 所以我都唔係太想佢地兩老表玩得太埋同成日一齊玩, 怕左....

家中有女初長成

"家中有女初長成"   呢一句真係好應景

17至19號係晴晴間幼稚園一連3日既聖誕表演, 分晒唔同班唔同時段, 晴晴班係尋日上晝第一個slot, 可以比平時晏少少起身同返學, 但都搞到差o的遲到, 仲要連一早突登買定要黎上台表演著既白色波鞋都唔記得左帶, 當下真係灰左

原來好多家長一早o係學校門口排隊等開門務求要坐到禮堂最前排位置睇小朋友表演同影相, 我地今次真係棋差一著了, 我地去到禮堂時已經得返後排位置, 影唔到靚相, 但好彩都睇得好清楚, 靚相就唯有等學校安排

見到晴晴跟住成班小朋友一齊上台, 個樣好得意, 動作又做到亂晒, 人地未做佢已經做先, 見到佢上台個樣已經覺得好感動, 諗返起呢個人仔, 由一舊小粉團, 好乖咁任我舞, 依家識行識走識駁嘴, 仲上台表演, 真係好難想像, o係屋企望住佢覺得都仲係一個bb仔, 出到去就似返一個小朋友, 大個喇, 唔再係baby, 會開始愈來愈獨立, 愈來愈少依賴屋企人, 所以真係盡量唔會放棄任何一個可以俾我管接管送既機會, 就算朝早返工會遲到, 都要帶埋個女等佢上左校車我先返工, 話咁快幼稚園K1已經返左3個月 (雖然10月份大部份時間都冇返學, 數埋只係返左4日學....), 真係轉眼間就過....

放左學後就返屋企食埋午飯再出去買聖誕禮物, 其中一個task係要同個女影一年一度既聖誕相

因為凍, 唔想周圍走, 近近地太古城就算, 點知今年個佈置真係好令人失望, 而晴晴就因為對個佈置毫無興趣, 而且個心已經向住買聖誕禮物呢件事, 所以真係冇乜點影, 影左一千零一張 (都冇睇影得好唔好...)

我就好失望, 晴晴就搵到佢好心愛既麵包超人個藍精靈毛公仔同埋個斜背手袋, 仲鍾意到唔要小白兔同小狗陪佢瞓, 同一位置已俾藍精靈取代左... 

同埋佢揀左一副lego公主城堡 (佢真係好鍾意呢set lego, 點都要買返呢一盒, 問佢要唔要其他如煮飯仔廚房, 佢話唔要, 因為已經有喇!! 好surprise佢會識得咁講...), 另一樣佢都好想要既係一個好colourful既玩具琴仔但佢唔會話屋企已經有而唔使買多一個囉....  爸爸問佢要邊一樣, 晴晴就話兩樣都要 (我聽到佢呢句自己就覺得好好笑!!) 最後爸爸要佢揀要lego定琴, 佢就放低個琴 (仲同個琴byebye話下次再買返你 @@"), 但返到屋企已經急不及待想要拆左盒lego, 爸爸唔俾, 真係慘慘豬, 每次有機會就想借o的二搣爛張花紙, 但都俾我貼返, 又成日問我過年未, 因為佢要玩2015年麵包超人月厝上面既sticker XDDD

學校欺凌

話說, 晴晴有一段時間突然好唔鍾意返學, 細問下原來佢俾同學仔吐口水, 而且唔止一次

同老師了解左, 已經冇事, 點知, 尋日, 又出事, 今次係另一個男同學

忍無可忍之下, 今日一早踩上學校, 本來想搵校長, 去到學校門口見到園長就園長都照搵, 原來老師尋晚就呢件事已經同園長report過同開會

當然, 唔會assume園長講既野會有咩野突破, 咪又係一輪官腔, 又話小朋友應該係冇心呀, 控制唔到個口呀, 有時一齊玩在所難免, 等等, 但佢地亦promise會盡量睇住小朋友, 我都唔知可以再做o的咩野, 自己個女俾同學仔咁蝦真係好嬲又心痛, 嬲到feel到自己血壓上升, 但點解又偏偏係我個女先有咁既情況?! 真係好無奈, 口水呢家野真係好dirty, 已經係大班, 仲要玩埋呢o的野, 真係唔能夠忍受, 希望今次親身上學校同園長傾完, 佢地真係會正視呢件事同埋留意多o的

只想晴晴開開心心安安全全咁返學, work hard play hard

K1第三個月開始

新居既裝修進度真係十分之慢, 由初時預10月中可以搬返去, 到現在10月尾先搬得成...仲岩岩好可以接住晴晴11月開始返學坐校車

每朝7點半前起身, 飲水又飲得慢, 食麵包又食得慢 (試過準備左通粉俾佢但唔食, 係都要食麵包), 又要換衫, 又唔俾我出門口先 (媽媽最遲8點10分一定要出到門口, 晴晴校車8點25分到, 仲有大把時間...), 所以每朝都要喊一大輪扭一大餐先搞掂, 不斷捽眼, 一時又係咁呻鼻水, 總之真係唔知點搞, 依家點都要跟我一齊出門口, 送到我去地鐵站, 之後就自己跟婆婆行返去校車站

放學就婆婆接唔坐校車, 可以早約半小時返到屋企, 之後就會食午飯, 瞓午睡

每日都想盡早返屋企同晴晴玩, 但每次我返到去, 晴晴食緊飯, 就變得極不合作, 婆婆話午飯時晴晴唔使一小時就可以完成晒, 但夜晚我一返到屋企晴晴就會走圍走, 食兩啖又會咳, 真係激C我, 所以都好struggle我夜晚應該要幾點返屋企好, 如果7點先返到, 我做得晒家務煲落湯沖埋涼已經成8點半, 但晴晴9點左右就要開始準備瞓覺, 我都冇時間真真正正陪到佢, 平時一般6點半已經可以返到去, 真係好煩惱

好多時氹到晴晴瞓覺我又會一齊瞓著埋, 咁又一晚, 往往扎正時已經係3, 4點, 但仲有好多野未做, 例如要準備晴晴既飯餸.... 真係好大獲

晴晴仲係咳, 主要係一早同臨瞓前, 瞓醒晏覺都會咳, 睇開個中醫又放左假未返, 尋日就試左用鱷魚肉煲湯, 會每星期都煲一次試住先

晴晴o係學校好多時仲會俾同學推跌, 老師又睇唔到咁多, 仲同婆婆講聽唔明晴晴講咩野!!! 我知晴晴講野仲係有好多bb話, 但作為一個咁senior既幼兒教育者, 我接受唔到佢地可以用呢個藉口黎開脫, 永遠話對方唔係有心, 所以作罷, 我亦唔係要找麻煩, 只想知道老師會唔會認真咁教導返同學推人係唔岩, 要講sorry, 要認真地知道咁樣係錯既, 但我唔知依家係一個同學推跌晴晴好多次, 還是唔同同學都推跌過晴晴, 係唔係大腿肌肉夠力就唔會跌到呢? 如果佢好大力咁推人想唔跌到都難囉... 呢個幼稚園既老師, 真係好得人驚..... 一定唔會recommend俾人囉... 自認已經落左賊船.....

每日作息時間:
7:20      起床
7:30      換衫, 飲水, 食早餐
8:10      陪媽媽返工再等校車返學
12:30    放學回家
12:45    午飯
14:15 - 17:00     午睡
18:00    晚飯
20:30 - 21:00    奶一枝
21:30     入房瞓覺, 但點都要磨到2230先瞓得著....

開學兩個月

9月差唔多返足咁多日學, 點知10月開始就做左逃學威龍...

開學頭1個月, 俾同學推跌左兩次, 去唔到自己prefer o個格toilet而大喊一場, 之後就唔係好肯返學, 平時一叫就醒, 依家會賴下床

9月尾開始病, 變成氣管敏感, 睇左4次西醫都唔好, 半夜會咳醒, 好多日都冇返學, 10月份只返左兩至三日學

因為咳同痰多, 已經好多日冇飲奶, 早餐可以食到半個至3/4個腸仔包, 最近都有返新居瞓過兩三日, 可以晏少少起身, 又晏少少出門口, 但始終未完成, 所以都要再o係婆婆度住多三幾日

我只想晴晴身體健康, 睇見隻豬仔咳成咁真係心痛C

希望11月份開始一切回復正常啦......

K1開學了

放了一星期長假, 為了陪晴晴開學, 帶佢返學放學, 陪佢上左兩日堂, 之後就要自己上堂了

做FTM呢一個星期真係好開心, 開心既時間係過得最快, 真係好想自己帶女返學放學全天候照顧....

返學第1日, 只需於9am至11am返到課室取書包校服就ok, 9點9出門口搭巴士但遇上塞車, 最後10點20分左右落車, 晴晴全程自己行, 由巴士站行去學校仲要行條長斜路, 再爬上4層樓樓梯先去到自己個班房, 真係唔能夠想像呢個小朋友咁有耐力... 仲要自己背住個小背包

因為好晏先去到, 老師俾左一大堆通告我地, 仲有書包同校服, 晴晴就自己玩, 冇幾耐就要散水, 之後我地返左舅公屋企食lunch, 再返利東煮晚飯, 晴晴仲食左一大碗炒飯... 10點未夠就瞓著

第2同第3日, 返9放9點9, 媽媽陪上堂, 全程自己搞掂, 我只係企埋一二邊睇住佢, 因為仲係適應階段, 呢兩日會分3個slot返學, 數過呢個slot有19位小朋友, 大部分都係學校既N班升上黎, 所以佢地都好熟悉o係課室活動既規矩, 相對晴晴要多o的時間熟習, 有時會到佢既不安, 但佢冇喊, 只會靜靜咁望下其他小朋友做乜, 佢就會跟住做, 呢兩日老師會分兩批小朋友進行活動, 有唱遊, 玩樂器, 聽故事, 做勞作, 又影左張相留念咁, 時間過得快又輕鬆, 晴晴都話返學好開心

最搞笑係, 老師講緊一個小朋友要開始返學既故仔, 好多小朋友會好active咁舉手講自己點點點, 例如食左咩野早餐, 晴晴都唔會執輸講埋一份, 仲要埋起身... 但最感動係, 唔知講到邊一節, 晴晴突然轉頭望住我, 同我講, "媽媽, 晴晴都會比心機返學架...."  估佢唔到囉...

第4, 5日, 晴晴要自己上堂, 返9放10點15分, 分兩個slot, 即係又多左小朋友一齊返學, 我地只能帶到晴晴去班房門口, 佢要自己入去, 放返本體溫簿入書包, 再放書包上木櫃 (有自己個名同相), 之後就要去洗水間洗手, 晴晴都好獨立, 自己一個冇問題, 都有同我地揮手byebye, 之後我地就去就近茶餐廳hea食早餐, 又周圍行下, 好快又要接放學, 呢兩日晴晴都好叻, 冇喊, 每次接晴晴放學都會話返學好開心, 之後就會拖住我跟住o的同班小朋友行落車站, 話要跟住o的小朋友囉... 完全唔聽人講, O晒嘴, 放左學要求坐電車返舅公度同表姐玩同食lunch, 下午就返屋企準備晚餐同沖涼, 一切都好smooth, 6點沖涼6點半開飯, 8點半飲埋枝奶9點3就會入房準備瞓覺, 所以朝早起身都唔會太難叫醒

9月8號開始就返兩個鐘, 開始一大班人上堂, 其實我好擔心, 始終我要返工, 往後都要婆婆帶返學放學, 有野又問唔到老師, 返工時又會好掛住個女唔知佢點, 希望快o的搬返北角, 咁就可以返工前帶晴晴上校車, 放到工又可以趕返屋企揍返個女... 晴晴比我想像中好好, 其實我冇諗過晴晴返學會唔會喊, 會唔會唔習慣, 都係睇到時先知, 但其他人常說擔心喊唔肯返學呢樣野就真係冇發生過, 我都好proud of晴晴既表現真係十分唔錯, 真係大個女喇...