晴晴幼稚園面試-合一堂陳伯宏紀念幼稚園

呢一日有兩間幼稚園interview, 最後冇去到上書房, 一來遠, 二來呢間學校雖然有學券但雜費一年要$5000, 寶血冇學券係$1500半年, 真係好貴, 而且就算有offer都未必會考慮, 所以最後都係去in合一堂, 都係北角區 (半山), 有巴士到 (屋企樓下有巴士站), touch wood要趕接返學放學既話飛的都唔使跳錶, 只係呢間學校有playgroup, 有PN, 所以晴晴既表現除非係好top, 如果唔係都應該幾難有offer, 所以呢次只係俾晴晴當玩咁去interview, 本來都唔想去, 係晴晴爸話既然都俾左錢咪去行下囉....

plan最遲9點9要出到門口, 點知, 我家大小姐, 又hea爆枝奶, 仲要飲飲下開大, 見到起身有聲咳, 仲要食埋藥先出得門口, 落到樓下已經係9點11, 都係o個句, 等極都冇車, 邊等邊行, 等左10分鐘先有的士, 去到學校剛好10點3, 去到reception我就排隊俾$登記, 婆婆就跟全住晴晴玩 (有兩座滑梯, 有車車, 晴晴應該都玩得幾開心) 但我地應該已經係遲左一batch, 去到要等下一輪先有得in, 我諗都等左有15-20分鐘, 頭兩batch既小朋友上左去interview之後就只係剩返一班playgroup小朋友同我地 (仲有早我地一分鐘到既一家人), 到playgroup小朋友去學室上堂, 就得返小貓幾隻, 等既呢段時間陸續有小朋友到, 愈來愈多小朋友, 晴晴開始要 "宣示主權", 霸晒滑梯唔俾其他小朋友玩啦, 總之真係O晒嘴, 最後玩到可以排隊上班房時好彩都肯離開 (冇好似上次o係寶血時咁樣....)

一batch有8個小朋友, 先上教堂聽校長講talk, 交問卷俾校長 (其實我覺得呢個安排都幾好, 家長可以知道學校既重點係咩, 同埋呢個學長都好好人), 好彩晴晴都好有耐性, 有時仲會唱歌自娛 (突然聽到佢唱twinkle little star我先知晴晴新學左呢首歌囉... 仲要唱得幾清楚), 所以都算好乖... 聽完talk, 再落返樓下班房group interview

小朋友圍圈坐, 家長陪埋一齊, 先唱兩首歌, 做動作, 但晴晴唔肯做, 仲要冇乜心機咁... 我問晴晴點解唔做動作呀, 佢話唔識唱歌呀.... (所以連動作都唔想做 @@"), 唱完歌就同公仔握握手(好似衛理堂咁), 握完就玩接波同推返個波俾老師, 然後就一老師對一小朋友餵公仔食野飲水抹嘴, 完成晒就拍手, 再唱多兩隻歌就完... 晴晴in得麻麻, 應該係咁多次interview最麻麻既一次... 

其實in既過程真係唔耐囉... 但等既時間耐, 仲加埋聽talk, 如果想趕下一轉interview就真係唔使諗, 之後等巴士返屋企又等左成15分鐘先有車, 返到屋企已經係12點幾... 所以咁多個interview最攰同最花時間既係呢一轉囉...

呢間學生要等兩個月先知結果, 即係可以唔使諗, 到時先再算...

辛苦晴晴喇!

晴晴幼稚園interview - 第五仗 + 賽果更新

終於收到明我封信, 等到最後一日通知期, 以為應該冇offer之際, 打開封信, 話收下午班, 即時鬆一口氣, 雖然並唔打算留位, 但起碼證明左晴晴既表現唔係想像中咁差 (反而覺得晴晴in明我o個日既表現比in寶血時好)...

16號去衛理堂interview, 呢間係first priority, 等左好耐既一日, 仲要in 8:30am (初時有諗過in完衛理堂就去隔離聖役彼得堂in埋, 但晴晴當日太早起身, 晨早一枝奶都冇食, 如果in埋真係會餓扁隻豬, 而且晴晴狀態一般, 唔想迫佢, 最後in左就返屋企), 平時真係瞓到淋一淋囉, o個日7點9整醒佢就拿拿聲換衫換片出門口, 照樣打的, 8點10分已經去到學校, 未落車已經見到有好幾個家庭企o係門口排隊等候, 等左10分鐘左右就被安排進入學校, 去到reception交報名費同拎返張application form, 貼埋name tag就入班房玩 (有o的似啟思咁) (只可以一個家長陪入去interview, 晴晴爸唯有o係禮堂度等我地)

(真係不得不提, 好多小朋友都病, 又咳又流鼻水, 但有o的家長真係由得佢地既小朋友係咁咳又唔遮住個口, 打噴嚏更加不在話下, 有o的小朋友睇落真係好病, 都唔知係唔係發緊燒tim!!! 唉, 搞到我都好驚, in完化後第二日晴晴真係有少少傷風同咳, 還好上星期o係醫生度配定藥, 食左兩日藥先叫做好o的, 唉... )

入到房, 晴晴自己揀左最近課室門口張檯搵個位坐低, 點知唔係佢心水鍾意玩既玩具, 佢想玩既又俾其實小朋友玩緊, 我自己都滴晒汗, 唯有氹晴晴一齊玩呢個玩具, 點知玩到咁上下佢已經停晒口扁晒嘴, 咁岩老師話可以去玩具櫃度揀其他玩具玩, 就帶晴晴過去俾佢自己揀, 最後佢揀左好似Lego咁樣既大塊塑膠積木, 自己拎埋位砌, 仲砌得好開心... 呢個時候, 老師帶埋張form走埋黎, 又問張form上面張相係邊個黎架... 晴晴識得答係黃凱晴, 之後老師問可唔可以一齊玩, 點知晴晴一邊砌一邊話"唔可以"!!! (我O晒嘴囉....), 之後老師又再搵話題同晴晴傾計, 話不如去玩具櫃度搵玩具一齊玩, 晴晴當時都想, 但當佢想企起身既時候老師已經拎左另一套玩具黎俾晴晴玩, 又叫晴晴俾個圓形波波佢, 又俾指令叫晴晴點樣砌, 我初時以為係warm up, 點知到老師行開左冇耐就話要圍圈玩, 心諗, "下? 咁就叫individual interview in完架喇?? 今次真係冇喇...".... 到圍圈玩集體interview, 老師請小朋友同隻洋娃娃shake hand, 大部份小朋友都做到 (有o的見到就喊...), 晴晴都做到, 之後就叫小朋友雙手掂下頭仔, 又雙手拍下大脾, 再拍拍手, 晴晴都ok做到, 之後就請小朋友企起身, 雙手舉起, 但好多小朋友未等老師叫坐低就坐返晒落椅仔度, 晴晴都係咁, 拿拿起抱返佢起身, 再跟老師指示轉圈, 好彩晴晴都好肯做, 感覺上晴晴o係呢一round就比較突出, 因為好多小朋友都冇做.... 都叫做有返o的表現... 到可以走得既時候晴晴先話要去玩滑梯 (真係好, 好過上次o係明我, 未in完已經話要去玩....), 所以去禮堂搵返晴晴爸後就搭車返屋企樓下個公園度玩, in完出黎都係8點9咋!! 真係超快....

衛理堂23號仲有interview, 所以要等到29號先知結果, 希望下午班肯收都好喇, 最多繼續waiting上午班, 話就話帶晴晴去玩, 我地亦都係咁同晴晴講, 但我feel到晴晴其實係覺得有壓力, interview始終有interview既氣氛, 呢種氣氛會帶黎壓迫感, 自己都覺得有壓力, 雖然冇好大既expectation, 但每一次都會希望晴晴有進步, 可能對晴晴黎講都係一種壓力, 所以其實都唔係好想再帶晴晴去interview, 但唔in又唔得, 始終依家留左位既學校唔係最心儀既, 唉....

近日天氣時涼時暖, 一早一晚就涼, 中午出太陽時又熱, 著多件著少件都好易出事, 希望晴晴身體健康

尋日收到蘇浙既interview信, 點知又同真光撞期, 可能唔會去蘇浙interview喇.....

remaining interviews:

30/11  聖瑪加利大

7/12    真光, 蘇淅 (2揀1)

暫時賽果

暫時in左4間, 有3間offer, 有一間仲未知

啟思 (杏花) - pm
懷恩浸信會 - am
寶血 - pm

頭兩間己經交左留位費，聽朝會去寶血交埋

我地住東區，地理位置最理想既學校會係懷恩 (有學券tim!)，但環境唔係太理想

寶血既學校環境真係好好, 課室開晒窗，夠通風，老師好有耐性 (interview時睇得出)，而且好出名，但2014年度開始唔再玩學券，同埋好似遠左o的 (雖然有校車)

屋企樓下冇幼稚園，最近既都要搭校車，有時諗，既然都係要搭車先返到學，係唔係應該根據學校既質素去選? 但又怕晴晴自己一個搭車會唔會驚.... 始終晴晴到時只係得3歲... 其實心水係衛理堂，衛理堂本身有自己既N班，所以K1仲要考上午班，成功既機會大概50%以下，由屋企樓下搭校車去衛理堂同寶血既車程唔會差太遠，衛理堂會快少少 (因為較近)，寶血都只係15-20分鐘左右 (行大坑道真係快)

但touch wood晴晴o係學校有咩野事要急call家長接返屋企時，我又怕晴晴婆婆搞唔掂(當然會俾定的士錢...)，點算好.....

晴晴幼稚園interview - 第四仗

星期六有3個interview:

明我 - 11:00am
玫瑰崗 - 2:00pm
明慧 - 4:00pm

較早前有考慮3揀2，因為時間上安排ok，但見晴晴好返冇耐，又唔想咁頻撲，最後只為晴晴揀1間interview就算，反正呢3間學校報黎只係俾晴晴玩下，唔係心目中杯茶

晴晴爸細時都係讀明我畢業，好早以前開始計劃報幼稚園時，佢要求呢間一定要報，其他既佢冇意見。

好啦, 當日，晴晴好準時起身，飲奶又快，本來真係大把時間，點知，有人只顧去toilet (仲要記錯時間，已經講左好多次係11點，佢竟然以為係11點先出門口!!)；另邊廂晴晴突然發脾氣唔肯換衫 (唔肯除身上面著緊既angry bird t-shirt)，亦唔肯食藥，當時我真係緊張得要命，時間一分一分咁過，又有人大安旨意一落街就截到的士，最後，我地10點50分出門口，由屋企樓下行到街尾都搵唔到一架的士，當時仲諗，要唔要更改計劃改去兩點玫瑰崗o個場，後來都係照原定計劃，11點上到車，一上到車就打去學校話遲少少，終於11點10分前到達。

到去學校，先去reception接返之前交既表格，又派左個籌 (跟籌interview，所以遲左都冇所謂，好彩), 先o係個好大既班房等，到叫number時就只可以一個家長陪同前往另一個遊戲室班房玩，每次大約叫5個小朋友，晴晴入到去已經自己搵位坐, 自己玩玩具，佢好鍾意個茶壺，就算玩緊其實玩具，佢都要keep住個茶壺，有一個男仔走埋黎想玩，晴晴一手就攞返個茶壺，連兩隻杯都攞埋，及後有另一個男仔問晴晴可唔可以借俾佢玩時，佢擰頭唔肯.....

玩到再叫number就入另一間房同老師interview，班房有1x組interview，每組有兩位老師做interviewer，去到先問晴晴叫咩野名，之後就問佢眼睛o係邊，媽媽個鼻o係邊，再俾隻入形狀既龜龜佢玩，晴晴都有同一款玩具，所以佢都唔想睇老師示範就已經伸手要拎黎玩，唯有拑住晴晴叫佢唔好咁心急，等老師講完先玩.... 玩左兩次；之後老師俾左一枝牙刷同紅色波晴晴，問佢係咩黎，晴晴話個波係apply (=.=  因為個波都幾大個同埋係紅色，佢好鍾意將紅色既野都叫apple....)，之後老師就叫晴晴俾返呢兩樣野佢；再黎砌併圖，因為未玩過，晴晴今次好留心老師做既示範，都ok做到；最後就係老師看圖講左個故仔俾晴晴聽，聽完就要答問題，圖中有4格，第一格係爸爸媽媽同晴晴，晴晴帶左生日帽，第二格好似係有個生日蛋糕 (已經唔係好記得)，第三格係晴晴拎住隻玩具熊仔 (生日禮物)，第四格好似係食物黎 (唔係好記得)，講完晒，老師拎左兩個人物出黎，一個係晴晴，一個係爸爸，老師問到底係邊個生日會呀... (嘩.... 使唔使咁難呀....)，晴晴指晒兩個人，仲講埋一個係晴晴，一個係爸爸.... 之後老師再問多一次，我又俾少少提示，最後晴晴指到係個女仔問生日會... 問完就再排隊等見校長....

我初時以為一個校長見，點知原來係有兩位，以為係單對單問野，點知又唔係，有個感覺係，校長係負責收返份form，同埋係咁2問下小朋友野，呢個時候，晴晴已經開始不耐煩，開始問想玩滑梯，我都覺得好慘，明明黎學校係有滑梯玩，點解到依家仲未有得玩.... 晴晴覺得我已經satisfy唔到佢，開始想扭計，唯有俾張form佢叫佢陣間俾校長，點知..... 點知晴晴竟然搣左張相出黎!!!!! 唉... 點算呢，真係O晒嘴 ，又不斷咁氹佢話等見埋校長就有得玩滑梯，仲有玩具拎架，拎埋就得架喇..... 所以.... 到我地見校長時，晴晴已經伸手去攞，都未有同校長傾計同批准.... 真係shit.... 咁校長唯有由得佢拎，仲問晴晴拎左架咩野色既車車.... 都冇好似前面既小朋友咁問得咁多 (只係我地相對地短....)，淨係問家長(我)有冇咩野問題想問... 我咪問我個小朋友冇讀過playgroup，會唔會俾好多麻煩老師架.... 怕晴晴成日都俾老師投訴

其實成個流程都in得幾快，但用咩野黎做準則去收生，真係唔清楚，同埋問既野都俾我expect既深，但發覺晴晴既表現都仲唔錯，未接觸過既野佢都算係handle到，至於聽故事答問題，我覺得對晴晴黎講真係太深，佢應該仲未去到可以分析呢個階段，始終仲咁細個，應該由得佢自己發展啦，亦都冇擔心過輸在起跑線上呢樣野，行行出狀員，最緊要係知道自己想點 (有目標) 同肯自己去take action! 呢樣野，真係冇得迫....

remaining interviews:

16/11 衛理堂 / 聖彼得堂

23/11 合一堂 / 上書房 (可能揀上書房in)

30/11  聖瑪加利大

7/12    真光

晴晴幼稚園interview - 第三仗

今次係去跑馬地寶血幼稚園。本來學校只係得11月2號一日interview，晴晴當時病左，發燒，所以唔去，同日我地一早打返學校問會唔會可以安排到另一日補返interview，仲連email都sent埋。當時其實我最關心晴晴既健康狀況，每次晴晴病、發燒，我都會好擔心，真係幾日冇得瞓。

到左星期一，我打返學校問收唔收到我地既email，接電話既女士就話已經記得左晴晴既資料，而且呢個情況下要求補interview既考生唔只晴晴一個，佢地會每個candidate review再通知能唔能夠安排到，等到下晝就收到學校電話，可以俾晴晴11月8號星期五下晝兩點半返學校interview，當時係好開心，但諗諗下，考生備忘有寫獲取錄考生會o係14號前收到信，咁即係其實2號o個日既interview都應該收左大部份考生，聽聞佢地收到1000份form, 上晝+下晝班只係得200個位，所以都估考到既機會唔會太大, 只係還個心願, 俾晴晴試下, 同埋俾佢玩下學校既滑梯 (有3條滑梯)，校舍既活動空間夠大，班房又有足夠既窗，環境真係好好

interview當日我同晴晴爸都請左假，餵晴晴食左大半碗字母粉，著埋衫就出發，出發時打的，2點左右就到，之後愈來愈多小朋友到達，唔止晴晴一個candidate，等左一陣 (待下午班同學完成午會)就安排小朋友們o係playground玩 (基本上晴晴一入到學校已經想周圍走)，晴晴自己周圍行，玩左好幾轉唔同既滑梯，有一個佢最鍾意玩，當有其他小朋友想黎玩既時候，佢竟然好焦急咁走埋去話唔俾人玩 (佢會講：晴晴架, 唔俾) ，唔知老師有冇聽到 =.=

玩左一陣, 開始叫名，晴晴唔肯入去，企左o係度，係都要繼續玩滑梯，之後仲喊埋! 唯有急急腳抱晴晴入班課.... 入到去, 課室中間有一張play mat，上面放左好多積木，班房周圍分別放左幾組檯同櫈，先請小朋友自己自由o係play mat上面玩, 家長只可以坐另一邊睇住小朋友玩，晴晴入到去已經唔再喊, 見到有新野玩佢已經自己走埋去坐低玩, 初時佢專揀圓柱型既積木玩疊高，冇幾耐突然有另一個肥仔走埋去將佢自己o個舊積木放o係晴晴積木上面，晴晴之後又搵多幾舊交俾呢個肥仔，諗住一齊玩，點知，呢個肥仔竟然掉走晒晴晴俾佢既積木，晴晴當時成個人呆左，佢個樣係唔知點俾反應，之後佢就自己玩，冇理其他人。

玩到咁上下，5位老師分別搵小朋友進行單對單interview，老師走埋晴晴度，晴晴初時唔理老師，老師問佢咩野名，係唔係晴晴呀，晴晴唔答，最後真係要我半推半就咁拖晴晴埋位interview。老師首先問佢叫咩野名，之後俾個公仔佢, 請佢指公仔既眼同嘴，然後叫晴晴揭書，點知老師都未問書既內容，晴晴已經好快咁揭本書仔，老師要由頭再揭過問佢呢o的係咩呀 (有蘋果，香蕉，提子，船，兔仔)，晴晴將香蕉講左做辣椒!! 唔知老師聽唔聽到.... 之後再俾一藍益智玩具俾晴晴玩，連我自己都未見過，晴晴唔識玩，淨係拎一兩個上手玩，老師就教佢玩其中一樣，砌完就拆返出黎，完成後老師送左一隻上鏈豬豬俾晴晴, 老師仲同晴晴玩左一陣，氹到晴晴o係到傻笑，但晴晴o係interview中間成日都想走開位，而且周圍都好嘈，in in下之前個肥仔突然又走埋黎晴晴度囉... 真係O晒嘴...

問完小朋友到問家長，問小朋友平時邊個揍，家長每日會唔會有足夠時間陪小朋友玩，婆婆平時會唔會帶晴晴去公園玩，但就冇問點解想讀呢間學校，老師再問晴晴鍾唔鍾意去公園玩呀，晴晴竟然答唔鍾意!! 我最佢你平時唔係好鍾意玩滑梯咩? 佢話唔鍾意!! 呢次真係到我呆左囉.... 到in完, 要出班房, 晴晴又唔肯，又要o係play mat就玩積木，本來唔得，因為仲有下一批小朋友入黎interview，老師最後話玩多一陣啦... 咁，最後我氹晴晴玩多幾個就要走喇，好彩佢都聽話

到我地出返去playground，剛巧係幼稚園學生止緊堂, 晴晴最愛玩既滑梯玩唔到，因為會阻住學生上堂, 我叫晴晴不如轉玩另一個啦，但佢唔肯，係都要等，最後因為唔知要等多幾耐，索性抱走晴晴，結果又係喊到唔收聲。

回程因為時間冇咁趕，可以搭巴士返屋企，晴晴o係巴士度瞓左一陣，返到屋企已經係4點鐘。

唔理結果係點，算啦，都係一個機會，又俾晴晴玩下，每次見晴晴interview都會睇到好多平時唔會察覺既野，見到晴晴既表現都會令我喜出望外，好surprise，晴晴又長大左喇! 

晴晴幼稚園interview - 第二仗

呢一日去懷恩浸信會interview，安排左星期五10點15分。呢個時間都幾好，我同晴晴爸請左上晝假帶晴晴去interview

由於晴晴食奶食得慢，而且成程又開左兩次大大，所以最後都係打的去，唔使跳錶

學校近屋企，步行約15-20分鐘；校舍o係住宅商場入面，所以唔係每個課室都有窗。今次係individual interview，初時以為又係好似啟思咁安排左1 log小朋友o係指定既 timeslots 一齊玩完再in，點知上到去，都唔係既，我諗佢真係安排每一個小朋友15分鐘，因為冇人等interview，而且我地上去時見到另一個媽媽抱住小朋友走，應該係in完10點o個轉

上到去，有個靚姐姐開門俾我地，原來係校長!!  由於呢一日係星期五，仲係返學日，晴晴見到好多大過佢既小朋友，淨係係咁望住佢地，又唔出聲咁, 真係好好笑。之後校長帶左我地入左一間好細既班房，晴晴坐中間，我同晴晴爸分別坐o係晴晴既左邊同右邊，今次係校長自己做interviewer，坐晴晴對面。校長俾左幾個遊戲晴晴玩，有認文通工具 (當時先發覺我地冇乜點教晴晴認唔同既車，例如消房車、救護車....)，有入形狀，分顏色，晴晴都ok做到，而且都算聽話，所以校長都即刻俾AM Offer晴晴 (面試信已經寫明會即時通知結果，所以一早準備左留位費)。

其實最令我印象好既地方係校長既對話，同埋佢自己親自interview，好似以前舊式既幼稚園咁, 校長係會真真正正咁去了解小朋友既情況，集團式既唔會由校長親自主理，全由老師負責。依家佢有埋AM Offer，所以真係一個大水泡。但唔好處既地方，係呢間幼稚園會收好多南亞裔既學生，亦有雙非同新移民；事先聲明，我係唔會歧視佢地，因為晴晴爸同自己都有睇過EDB既學評報告，大部分都係教學方面可以再作改善，呢樣我都覺得冇問題，最令我地需要考慮既，係報告話學校會花較多時間o係南亞裔、雙非同新移民既學生，另本地學童既需要未被兼顧。

其實當晴晴仲係bb既時候，為晴晴搵幼稚園都會prefer愈近屋企愈好，始終唔想咁細個小朋友就要坐咁耐車先返到學，但樓企樓下一間幼稚園都冇 (已經執左笠好幾年)，第二近既又係出名commercialize既無學券私校，如果真係要俾錢，希望都搵間口碑好既，所以就算報左in埋都未必會俾晴晴讀 (當然佢地收唔收又係一回事)，既然返同區幼稚園都係要坐校車，遠近已經唔太重要 (當然唔會返中西區，雖然中西區有龍校，但真係距離實在係太遠...)。當然都要睇返晴晴黎緊之後既表現係點，黎緊幾個星期都仲會有其他學校既 interview，但只會2揀1，所以，留位費係一定要俾，到時再作考慮

同一日亦去左杏花村啟思交留位費，俾埋申請轉上晝班封信，睇下轉唔轉到啦，晴晴爸其實都幾鍾意間學校，俾佢揀懷恩定啟思，佢一定揀啟思

interview schedule updates:

8/11  寶血

9/11  明我 / 玫瑰崗 / 明慧 (揀1間就算)

16/11 衛理堂 / 聖彼得堂

23/11 合一堂 / 上書房 (可能揀上書房in)

30/11  聖瑪加利大

7/12    真光