又覆診 - wk19

本來係Christmas前後先再做產檢, 但因為老公Christmas要返工, 又想快o的見下bb, 所以早左去覆診...

bb一切正常, 我就愈來愈重... =.=

照結構 - wk18

星期六睇完醫生, 星期一打電話俾C醫生介紹既K醫生book照結構, 點知冇晒期, 真係好過份, $1800一次都咁多人既? 唔係咁呀化, 唯有打返俾C醫生同姑娘講, 請佢地俾多一個醫生我可以約到照結構, 最後俾左L醫生既資料我, 仲話問過有期既, 叫我打去confirm就得... 

約左今日下晝去中環照, 原來呢個L醫生都好出名, 係照結構既權威醫生喎, 收$1500, 都好過去九龍既, 唔使咁遠... 去到已經勁多人囉, 仲要好多大陸人, 佢地真係超有錢, 勁... 約左3點, 點知我早到, 都係要等, 仲要等到4點半先有得照, 入到去仲要等多15分鐘先見到個醫生, 態度串串地, 問C醫生部機唔夠清咩?? 咁.... =.= anyway佢都ok既, 照左20分鐘到, 18週, 頭仔手仔腳隻都早週數, 冇兔唇 (呢樣我勁擔心, 因為我都有, 好彩係右邊面, 唔係中間位...), 樣樣都ok, 照完已經係5點半, 咁就用左我半日時間... 真係等到個人發晒霉咁制囉... 但都值得既, 見到bb個尖尖下巴, 好過癮呀!!

我個肚都唔算大, 只係已經開始著大肚褲, 以前著開既Levis太緊, 怕cool到bb呢~

覆診喇 - wk17

星期六覆診既好處係, 唔使特意請假, 因為公司始終都唔係咁鍾意, 但唔好處係, 就算你book左幾多點都好, 都一定係會等到發呆....

今日又要抽多一次血, reconfirm個Oscar Test既result, 另一方面就係要約照結構, 要出去其他醫生先有得照, 醫生俾左封信我去約, wk22之前要完成...

每次產檢照ultra sound都唔係好覺個b有郁咁, 懶洋洋咁... 體重繼續有進帳, 就快突破100磅大關!!

等結果 - book床位- wk13

打左幾日電話都話未有報告返, 真係好心急, 而且好擔心, 心諗會唔會係因為first test有問題而要再做多一次, 所以先咁耐都未有呢... 醫生話3-4日, 但化驗所就話要5日, 又要o係封referral letter到期前去book床位, 個心真係1516.... 

最後決定, 星期五上晝去醫院交deposit book期, 之後就再打電話問結果, 好彩... 一切正常......

Oscar - wk12

放左1個星期假, 要覆工喇, 每行一步都好小心, 俾人笑我行路踩C蟻...

為左唔行咁多唔, 返工放工改坐巴士, 因為公司樓下已經有站... 老闆亦都好好人咁唔使我點OT, 所以平時都係7點前就放工, 多o的時間休息

又到左產檢既日子, 聽好多mama講照Oscar, 度bb頸皮, 但唔知點解我呢個醫生都好似冇乜點樣額外做Oscar咁, 都係同平時產檢咁照ultra sound咁睇... 同埋要驗血, 醫生叫我地3-4日後打電話黎問result, 同埋要confirm係唔係搵佢接生啦, 同埋要book醫院....

體重都係咁上下, 開始有增長喇, 而且冇嘔得咁多, 可以食返多o的野喇...

唔通真係大陸人特別多, 連私家醫院既床位都咁爆.... =.=

覆診 - wk9

為安全計都係睇多次醫生, 請醫生幫我寫返張假紙, 又再打多枝針, 希望冇事...

bb已經有頭, 手仔同腳仔, 好似仲腳yan yan咁... 真係好神奇~

訓床訓到個人好攰, 真係腰骨都直晒.... bb您要加油呀, be tough!! 

出事驚魂 - 2 - wk8

是日長週要返工, 同同事一齊叫早餐, 食完又係全部回吐 @@"

12點幾去洗手間, 小解完之後, 正想行出toilet, 突然feel到有野流出黎, 即刻除褲睇, oh no....我見紅呀!!! 仲要係粉紅色+紅色既血, 驚到成個人震晒... 拿拿聲同老闆娘講, 早退睇醫生 (好彩C醫生o係附近), 老闆娘仲叫個同事陪我一齊去...

去到診所, 好彩唔係等左好耐已經有得睇, 同醫生講左個情況, 檢討左一輪, bb有心跳冇事, 但照到胎盤同子宮中間有個好細少既黑影, 可能就係呢o的地方出血, 應該冇乜事, 打左枝針, 休息一兩日應該冇問題

體重比上次輕左兩磅, 得返84磅, 好耐都未試過咁輕喎....

但我仲係好驚, 返到屋企之後, 成日留意住仲有冇流血, 真係好驚好驚, 除左食飯去toilet之外就淨係攤o係張床度, 郁都唔敢大動作... 當晚仲有流啡呀, 勁驚, 決定都係自己抖一個星期, 同公司請病假....

嘔.... wk7 la~

因為period一向唔準 (其實我係連上一次auntie幾時到我都已經唔記得左...), 所以都計唔到幾多週, 以size黎度大概係4週左右, 冇幾耐就開始食唔到野, 食乜都嘔, 嘔到黃膽水都嘔埋... 

初時未confirm會睇邊個醫生, 都係兩個揀一個 (C醫生同L醫生), C醫生好近公司 (一街之隔), 而L醫生就係中上環

好快又過左1x日, 係時候去C醫生度覆診, 已經照到bb有心跳, 好開心! 體重冇乜點加, 都係8x磅

因為乜都食唔到, 唯有日日兩杯孕婦奶粉吊住營養俾bb.....

出事驚魂 - 1

家庭醫生寫左兩封信俾我, 一封係俾公司既證明信, 另一封係俾我去政府醫院排期, 其實之前都有諗, 都係一個, 可以既話緊係去私家 (同自己同一間醫院出世....) 而且又仲有一筆reserve可以用, 所以都冇乜點考慮就決定左去私家醫院既婦產科做checking.

9月頭既時候突然有一日隻左眼畏光而且勁流眼水, 應該係發炎, 就去左睇眼科, 仲俾左知藥水我滴, 滴左3日左右. 初時都冇理會有呢件事時存在, 唔知點解心血來潮, 搵返眼藥水張說明書一睇, 慘喇, 原來呢枝眼藥水係唔應該俾懷孕初期既人用架!!! 當時我好驚好驚, 就係第一次checking既時候問醫生, 個醫生一睇完, 就話, 係唔用得架, 呢隻藥雖然未試過o係人體上做experiment, 但係做過動物測試 (白老鼠), o的鼠b既關節會出問題, 而且藥已經入左bb度, 產檢同出左世都未必check到, 要到發育時期先會知道有冇問題...嘩, 我一聽到咁講已經驚到想C, 不過醫生又話都唔使咁擔心既, 都唔需要嚴重到唔要得個bb, 當場鬆左口氣

點知返到屋企, 屋企當中有人覺得唔應該冒呢個險, 而且個醫生又答到咁唔實在, 襯仲未成形既時候處理左, 等自己個心唔好咁難過, 我個心真係沉晒, 我地兩個都唔想唔要, 而且老公覺得都未必係佢想想像中咁嚴重

不過到最後, 我地都係搵多一次呢個醫生, 同佢講都係決定要放棄個bb...個醫生聽到之後好緊張, 即刻搵本reference俾我地睇, 話其實都係low risk黎既, 而且o係一般正常既懷孕情況都會有3-4%既bb有關節既問題, 叫我地再考慮一下, 但因為當時我比較堅決放棄, 所以佢就寫左封referral letter俾另一個醫生, 叫我去搵佢... 當時我已經喊到收唔到聲, 因為真係十萬個唔捨得... 

離開醫院之後就立即去左referral個醫生度, 等緊o個o陣, 老公同我講, 不如我地問埋佢既意見先, 反正都黎到, 咪問多一次囉.... 到我地見醫生既時候, 俾個藥名佢睇, 話係眼藥水, 滴左3日, 每日次既份量, 醫生睇完之後, 就話, 下? 眼藥水, 都唔知經過幾多個cycle先過到俾個bb, 而且個份量咁少, 當你滴左10滴都係好少, 其實就唔使咁過份擔心既, 不過當然如果你話想個bb係冇任何藥物既情況下成長, 放棄都係正確既, 而且就算正正常常咁懷孕, 個b出到黎都唔係保證100%冇事既, 再者個胎長唔長到亦都未知, 有20%係長唔到, 叫我自己考慮下, 10日後再返去覆診, 又或者打個電話黎book手術亦都冇問題.... 我地聽完之後個心都舒服左好多

睇完呢個醫生之後, 就打電話俾屋企人同佢講返個醫生講乜, 佢就俾埋佢睇開既婦產科醫生既資料俾我, 叫我睇埋, 聽下佢既意見... 點知呢個醫生仲搞笑, 睇完支眼藥水之後就放低左, 話冇問題, 佢都有開呢隻藥俾孕婦食, 我就問佢, 有資料話做過動物實驗係會令o的bb既關節有問題喎, 佢就話, 動物唔同人, 當冇滴過就得喇.... 嘩, 我聽完之後簡直係如釋重負, 而我地亦都決定左一定會要呢個bb

就係咁, 就開始左我每日兩杯安滿既生涯....

我有左?!

8月既時候大病左一場, 事源於我隻智慧牙, 令到我喉嚨痛左一星期, 食左好多藥都唔好, 到最後都係決定脫左隻牙, 點知脫既時候整損左個腮, 變左痱滋, 仲要帶痛去澳門玩, 都冇諗過會搞出人命....

到左9月, 發覺好似有o的唔妥, 自己既period一向都唔準, (試過有一次遲左成3個星期都未到, 以為bingo, 點知到睇醫生o個日auntie自己黎左....), 應該都未遲, 反正又有tester存貨, 咪開枝黎試下, 點知.... 真係中左.... 拎左枝tester俾老公睇, 之後佢就陪我去醫生度check多次 (因為如果真係bingo既話, 就要第一時間同老闆講, 俾埋封信佢, 以策安全...), 醫生都confirm真係bingo左....

\

就係咁, 都唔知算係意外, 定係plan定....