呢個X'Mas帶晴晴同晴晴婆婆、舅公舅婆、晴晴爸爸 (結左婚5年都冇返過, 拍拖時仲有返下)、仲有小喬表姐一齊返中山玩, 晴晴比年初返去過農曆年時活躍左好多, 每日都要晴晴爸陪佢上落樓梯, 行3層樓架, 每朝早聽到表姐把聲又會自己彈起身話瞓醒喇, 之後就會跑出房搵表姐玩
中山比香港凍 (我自己覺得), 尤其是剛到步時, 今次係平安夜晚出發, 24號我同晴晴舅婆仲要返工, 又唔可以請咁多假, 又唔想25號先返, 浪費左一日, 我地坐6點鐘班車去深圳灣 (晴晴上車冇耐已經瞓左著), 差唔多6點45分就到, 落車過關時已經覺得比市區凍, 好彩過香港同大陸關時十分順利 (如果唔係我o個張 "通行證" 要check得耐既話應該可以仲快o的), 關口好多人, 有時俾晴晴自己行, 有時就會抱住佢跑, 過左關表哥 (小喬表姐爸爸) 接我地, 但都行左一段路先上到佢架車, 一路上都覺得凍, 晴晴已經係咁打噴嚏, 真係嚇C我.... 上到車, 晴晴冇幾耐已經開始嘔 (暈車浪 @@"), 都唔算嘔得多, 因為有上次經驗, 我地早少少俾飯晴晴食, 又口口敢俾太多水晴晴飲, 所以都還可以, 冇幾耐晴晴又瞓著左 由深圳灣返中山屋企約兩個半鐘, 比預期快, 差唔多到時晴晴瞓醒, 冇再嘔, 一落到車即刻舒服晒, 仲可以自己行入屋, 我自己就覺得好凍囉, 好寒, 一到步已經俾飯晴晴食, 但天氣太凍, 由保溫壺倒出黎既飯好快就凍, 晴晴都食左大半, 最後瞓前補多枝奶俾晴晴就ok, 依家屋企有晒冷暖氣, 入到房就暖晒
呢5日都冇乜點出去玩, 只係有某幾餐要出街食, 要座3輪車, 晴晴又ok, 冇暈浪, 但佢好緊張囉, 每次都捉到我地好實, 雖然大風, 準備左件雙面褸都仲可以頂到, 其實第二日開始已經覺得冇咁凍, 可以習慣左, 但鄉下既溫差都好大, 一早一晚可以差10度, 所以兩個小朋友都著好多衫, 成隻糭咁, 今次我都帶唔夠衫俾晴晴, 第2朝晴晴婆婆出去買多一件夾綿抓毛背心俾晴晴, 所以全程都好夠暖
其實上次農曆年返去時我帶左好多衫俾晴晴, 今次都係帶返咁上下, 但就冇expect都真係幾凍, 以為有羊毛仔已經足夠 (上次除左羊毛仔, 我仲帶埋冷背心, heattech樽領, 仲有毛毛背心著外面, 冇準備睡衣但厚既家居服都帶左兩套), 點知比上年農曆年仲未凍, 而且5日來天氣都係咁上下, 真係失策, 如果唔係出發前一晚顧住搞證件, 應該仲可以準備得好o的
晴晴今次多左活動, 每日食完lunch都會跟表姐出去踩單車, 晴晴仲未識踩, 佢坐左上去, 我地就幫佢推, 玩得好開心, 同表姐輪住玩, 同表姐多左interaction, 又試過兩老表打交, 表姐唔俾佢入房, 晴晴先喊, 再瞓地, 大人抱佢起身時, 佢仲要起飛腳踢表姐, 到起左身又一野撞埋表姐度, 表姐成個人又跌低左, 成個過程真係好好笑, 晴晴真係大個左, 仲講多左野, 真係意想不到!
沒有留言:
張貼留言