玫瑰疹

晴晴由25號既零晨開始發燒, 25號上晝即刻睇醫生, 話係喉嚨發炎, 點知返到屋企食左退燒藥都唔退, 仲要持續上升, 到嘔左幾次, 26號朝再搵睇醫生, 醫生就轉另一隻消炎藥, 情況好左少少, 起碼冇再嘔, 同埋少食多餐, 主要係食用果皮, 薑同瘦肉煲既白粥, 每次一細碗仔, 大約兩個鐘左右餵一次, 因為食奶又會惹痰, 而且都唔係太肯食, 所以有一整日淨係食粥.... 由於晴晴食藥食到怕, 我地主要俾消炎藥同退燒藥俾晴晴, 當然又要打一場交咁樣先餵到藥水.... 見到晴晴咁真係好心痛... 燒一直都係咁上下, 有藥食時最低可以去返99.3, 但藥力差唔多過時就會急升至101或以上, 最高試過102.5, 如果係夜晚就會拿拿聲塞半粒pat pat, 日抖既話都會係食藥, 跟指示4個鐘一次, 如果食左一個鐘都冇退而且仲升既話就要食埋隻助退燒, 基本上大部分時間都係維持100-101.x左右

呢幾日天氣都係比較涼, 但因為晴晴仲發緊燒, 亦唔敢俾佢著太多衫, 都係一件長袖底衫加半心, 手隻腳隻係凍但個頭就好熱, 真係擔心C我...

直到星期六晚至星期日零晨, 發覺晴晴已經退左燒, 體溫回落返正常水平, 到星期日朝早起身都冇事, 夠鐘食藥都冇燒返, 真係好開心, 覺得好神奇, 但當時冇為意晴晴係出玫瑰疹, 得塊面仔花花地, 一直都以為係皮膚敏感而冇乜理, 點知到星期一朝早起身, 發覺晴晴既體溫突然間高返, 未到發燒但平時朝早一定唔會咁樣, 到佢去完poopoo, 先睇到晴晴個頭同個身開始出紅疹, 都多多地, 但手腳就就冇乜, 耳背都有, 驚起上黎, 唯有叫晴晴爸下晝再帶晴晴去睇醫生, 醫生睇完就話應該冇咩野事, 今次係玫瑰疹, 而且差唔多出到尾聲, 過多兩三日應該會好返晒, 連感冒既病徵應該都會冇乜.... 知道係玫瑰疹, 放工即刻買芫茜(用黎抹身)同埋竹藨茅根(煲黎飲清熱), 連續抹/飲左兩日, 已經好返好多, 點知又受到夜晚瞓覺鼻塞困擾, 搞到晴晴唔想瞓覺 / 瞓唔到, 真係暈得低....

病一病, 又冇左幾磅, 唉.... 瘦晒.....