第廿二個月

晴晴1歲10個月, 感覺上好似瘦左, bb時期要著大好多碼既衫, 依家真係唔多得

bb時期多數買哈衣, 好靚好得意, 又可以勁買, 到晴晴差唔多足一歲時, 夏天既衫已經唔岩著, 又可以買勁多, 有o的仲係買大少少 (以為晴晴會繼續加大碼), 點知, 1歲後既晴晴唔太長肉, 18個月size既衫都仲會鬆, 更何況係24個月既size.... 到左冬天, 先勉強著到24個月既衫, 當oversize咁著, 所以, 今年夏天, 見到又有新款既bb衫, 雖然我好想好想買, 但今次俾自己既理智控制住, 會拎返上年既衫, 試下著唔著得落先再買, 因為晴晴上年冬天既哈衣 (12個月size), 大部份都俾晴晴婆婆改裝成上半身面衫, 仲著左成個冬天囉, 著到依家都仲著得落架... 好明顯, 呢個女, 真係愈大愈slim呀, 唉... 成條長身魚咁 =.=

最呢兩日突然暖左好多, 有點兒似初夏, 但又唔敢咁快幫晴晴換晒短袖衫, 唔知係唔係太熱, 晴晴呢幾晚都瞓得唔好, 每晚臨瞓前都自己將褲腳拉到高一高, 好似人地落田做野咁, 半夜總會醒幾次, 仲要係成個人坐左起身要搵手巾抹眼睛... 都冇乜點蓋被, 照計應該岩岩好...

身高同體重比上個月都係差唔多 (其實係冇認真咁度高同磅重), 一日食兩餐飯, 飯連餸約有一個大人飯碗既量, 再加三餐奶, 依家試緊由思敏傑轉牛欄, 思敏條太甜, 牛欄好似冇咁甜, 希望冇咁易惹痰

愈來愈曳, 想要想玩既野得唔到就會爆喊, 愈喊愈大聲, 係咁扭計...

講野都講多左, 識得分"大","細", 認到幾個英文字母, 識得叫你 "起身", 但bb話既比例仍然好高....

看似大個左, 但可能因為頭髮少, 望落仲好似個bb仔咁

有時都會諗返起晴晴仲係bb時既樣子,  難以形容既心情呢!

第廿一個月

2月16日, 晴晴又大一個月了!

俾晴晴爸爸惡搞既相....

呢個女, 真係愈來愈曳, 曳到失晒控

話說, 呢個農曆年, 帶埋晴晴同娘家一齊返中山過年, 今次亦都係第一次帶晴晴去旅行

第一天出發, 真係搭車又搭船, 船開航冇幾耐已經爆喊, 暈船浪, 連奶都冇乜點食, 只係食左4安就瞓著左 (咁都好o的)

到上左岸再坐9個字車, 仲差少少, 真係差少少就到步, 晴晴已經嘔返晒之前食既奶, 我同佢成身都係嘔吐物, 當日又大風又凍, 真係好擔心晴晴會唔會冷到...

一到達目的地, 就連忙幫晴晴沖返個熱水涼 (可惜水唔係太熱), 換返乾淨衫, 食埋粥就瞓晏覺, 好彩晴晴都算適應新環境, 夜晚瞓覺都算ok, 只係因為爛玩而唔肯瞓覺而發脾氣爆喊....

返到鄉下, 地方大左, 又多樓梯, 對晴晴黎講真係開心到暈, 勁鍾意行樓梯 (當然要有人手扶住佢行), 但行一層樓左右已經投降; 每次上到天台, 都會好興奮咁周圍走呀走呀, 去到人地屋企更加失控, 又爬欄杆, 仲要親吻佢地, 我唔俾, 佢就發我老脾, 跪地瞓埋地tim, 再唔係就係咁掃野落地下... 依家晴晴就算出街食飯都唔會再係乖乖地坐o係度, 點都會搵野玩呀, 咬呀, 仲要係坐得唔耐, 所以每晚出街食飯時都會搞到我頭昏腦脹

講野叻左, 講多左單字呀, 食飯要自己揸住匙巾黎食, 但返到去始終唔能夠食足兩餐飯仔同三餐奶, 好多時都會少緊一餐奶同飯, 食多左雜食

返鄉下之前去醫生度拎定看門口既藥 (傷風, 咳, 化痰等), 醫生同晴晴磅完重大約有13kg, 終於都有返少少進帳, 高大概係86cm左右

玩左8日要返香港, 回程當然又係搭車搭船, 今次, 更加係喊到收唔到聲, 仲要係咁不停扭計, 返到屋企都要俾保嬰丹佢食, 當晚就瞓得好好囉, 但之後幾晚就瞓得好差, 好易醒, 唔知發生咩野事...

第十九個月

晴晴20個月大了!

19個月大時既晴晴, 識講多左單字, 有一日我放工開門, 咁岩門口走廊位有個叔叔做緊清潔拖緊地, 佢竟然叫人叔叔! 真係O晒咀...

前兩日打返屋企睇下晴晴瞓醒未, 佢o係電話度叫我媽媽呀! 真係開心到我暈得一陣陣...

不過仲係超級野蠻呀!  唔高興就瞓地爬地 (明知我唔鍾意....), 到夜晚瞓到半夜佢醒左, 我唔理佢, 佢就會好狠咁手扯我o的頭髮同大喊

12月燒左兩次, 一次係因為腸胃炎 (退左燒一日後突然又返燒, 第二朝冇事), 一次係打左歲半針 (燒左兩日...), 點知1月又燒過, 今次係低燒, 初時我以為係尿道炎, 因為近來晴晴每次想weewee時就摸住個褲襠位, 醫生就話係輕微感冒, 睇左兩次醫生先好

話說今年過年打算帶埋晴晴一齊返中山過年 (娘家每年都會返去過年), 由我陀B到生B, 都有好多年冇返過去, 見晴晴依家識行, 大個左, 又可以食大人野, 應該會方便o的, 月頭就帶左晴晴去辦旅行證件 -- 回港證同回鄉證, 晴晴影證件相都算乖, 都ok啦

依家仲係食粥仔, 佢prefer一粒粒飯帶濕既texture先肯食, 有時煮杰左粘左o的就會食得好少... 一日兩飯, 有時3奶, 有時兩奶, depends佢每日幾點瞓醒, 前一陣子天氣涼, 會瞓到成11點先醒, 就會cut左一餐奶, 暫時最like 蕃茄魚肉飯, 肉碎就唔多好, 勉強先食到一碗... 奶都係7-8安, 有時只係食到5-6安

今個月冇磅豬仔同度高, 感覺同上個月應該係差唔多

夜晚點都要11點先瞓, 早入房遲入房都係咁上下時間瞓, 依家多左樣野, 佢會主動叫我拍住佢pat pat / 心口/背脊咁"暗"佢瞓, 好得意架

呢個月裡面感覺晴晴又識多左野, 見到電視有人跳舞佢又會跟住一齊跳, 見到電視有人玩音樂, 佢又會拎個玩具琴黎玩, 見到晴晴開心, 我已經開心到冧晒!!

依家只係擔心隻豬仔唔知幾時又會無端端發燒, 前兩日真係嚇親我, 我返到屋企, 晴晴婆婆同我講話探熱有99.5, 當日天氣又真係幾暖 (好似春天咁既感覺), 已經冇著件冷背心打底, 可能件面衫比較焗, 拿拿聲同晴晴沖個溫水浴再換返o的薄少少既衫褲, 其間體溫都keep住99.2左右, 好彩到臨瞓前晴晴已經冇事正常返, 所以呢幾日我都好緊張keep住同晴晴探熱

20個月大既晴晴!

真係嬲到爆!!

文章日期：01/02/2013 05:28 pm

話說尋日帶埋晴晴去太古城行街街, 去Uniqulo睇下有冇野買, 已經見到條好長既人龍等緊排隊俾$, 睇完冇新貨打算走, 行經一個女人, 佢突然向住晴晴咳 (因衰尋日貪新鮮試左條新揹帶係晴晴向前望既...), 真係俾佢嚇親我, 搞到我即刻掉頭走, 我仲講左句嘩, 有冇搞錯咁, 但我冇直接向住呢個女人講, 我行緊既時候佢向住我大聲咁發晒難渣話我好講呢句說話, 仲話我痴線tim! o個刻我真係好想同佢開火, 最好影埋video囉, 有冇睇電話教, 咳式打噴嚏要用紙巾蓋住口鼻, 就算冇都起碼用手啦, 佢冇不特止, 仲要向住個bb咳, 有冇黑心o的呀!! 真係超冇品囉!  希望晴晴冇俾呢個女人傳染到 + 以後超多人既地方打C都唔帶晴晴去!

end of the year

又一年了!

舊年既今日我仲享受緊FTM既生活, 日日煮飯俾晴晴食, 陪晴晴瞓晏覺, 做下家務, 又去下街街

晴晴當時仲係一舊飯咁, 識得坐, 但仲未識得自己由瞓低坐起身, 如果坐坐下瞓左o係度就會大喊叫救命

1月份, 我又要返工了, 日抖要交俾晴晴婆婆照顧, 當然係好唔捨得.... 晴晴都開始學企, 但仲未識行, 呢一年過舊曆年真係好凍

2月份, 晴晴開始學行, 可以扶住櫃, 檯, 牆咁移動, 一個月後成功學行

3-4月份, 開始肯食粥仔, 唔使再獨孤一味食字母粉, 真係開心C我, 突然間追得返晒成長進度, e.g. 識得爬牛牛, 瞓低自己起身, 轉身轉得好smooth (之前一o的都唔識轉身, 人地6個月大要識既野晴晴真係唔識架...), 當然跌親既次數愈來愈多, 變左大冬瓜 =.=

5月份, 唉, 慘囉, 出世以來第一次發燒, 仲要高燒, 燒足個半星期, 支氣管炎, 連生日都冇得大肆慶祝

6月份, 打完針又燒過, 出埋疹, 之後每個月都要燒一燒病一病見見醫生 (真係要身體健康呀!!)

7月份, pat pat紅得好勁, 變左皮膚炎

8月份, 吽牙仔, 不停咬手指, 識得同好close既人做 byebye 動作同飛吻

9月份, 無驚無險, 繼續頑皮倒蛋

10月份, 又病左幾日..... 玩電話玩上癮, 成日要睇喜羊羊先肯食飯食奶...

11月份, 認得晒大部份家庭成員, 識得手指指, 其實應該識得叫人但唔肯講....

12月份, 出世以來第一次腸胃炎, 要轉豆奶.... 打左針, 低燒左兩日

呢一年睇醫生既次數真係多過我去shopping呀, 2013年 onward 要繼續身體健康!!  

打歲半針

約左22號星期六上晝帶晴晴返健康院打針, 一直都以為係10點, 點知, 到臨瞓前拎張針卡出黎睇時先發現係9點鐘, 好彩睇睇, 如果唔係又大件事...

一個星期前腸胃炎發左兩日燒, 而且仲有少少肚疴既情況, 以為唔打得針要再約, 但唔理點都好, 打針前一個星期隔日煲意米水俾晴晴飲, 到打針前兩日就日日飲, 希望打完針唔會發燒/燒得勁

星期六真係比平日好, 今日仲要係特別少大陸bb, 終於都見返香港人bb同父母, 真係好靜, 好快; 晴晴o個朝起身賴床唔肯換衫, 真係差o的遲到, 好彩行一個街口就到, 自己行快少少登記左先, 晴晴婆婆就抱住晴晴行, 都趕得切, 一黎到已經叫名入房磅豬仔...

12kg重, 85.5cm高, 重量比我expect既輕, 可能因為之前腸胃炎輕左, 因為上兩個月去睇醫生時磅都已經有呢個磅數....

姑娘話ok可以打針, 冇燒得可以.... 今次遇到個好好既姑娘 (之前都見過....), 佢好認真咁同晴晴做test, 疊積木, 餵公仔食野, 晴晴都肯做, 真係好彩.... 但講說話就唔得, 姑娘話晴晴識既單字少左o的, 所以足兩歲後要再返健康院check up....

到最後等打針, 今次由我抱實晴晴 (之前都係由晴晴爸爸負責), 打手臂仔, 呢頭除衫o個頭拮完再貼埋紗布都只係幾秒鐘, 晴晴真係一聲都冇喊過, 定係佢都唔知已經打左針.... 打針前姑娘係咁同佢講野, 當時佢都好迷惘咁, 又可能今次負責打針既姑娘手勢好好, 真係快過打針...

頭一日打完針都有食住退燒藥, 所以第一日冇燒, 成晚都冇事, 點知, 第二朝起身就黎料, 好彩最高都係99.4, 食左藥就退返少少, 但都係燒燒地, 夜晚瞓著左又冇晒事, 以為已經捱過左, 點知... 第三日朝早起身又燒返, 不過呢一日就好好多, 食左藥就退, 不過都係要食足一日4次藥....  到第四日就冇晒事lu... 當中有一日我都有煲雪梨意米水俾晴晴飲, 可能真係有幫助掛....

晴晴呢排真係好易發燒, 上個月試過無端端都會發燒, 都唔知食左幾多樽退燒藥.... 真係擔心....

歲半了!!

晴晴19個月大喇, 回顧歲半既bb有咩野唔同先...

身高/體重: 未知, 呢個星期六會返健康院打針, 到時度下就知

牙仔: 上顎對犬齒出左成3個月先見到一半 (由15個月大時發現到依家...), 下顎其中一隻較明顯, 另一隻就淨係見到少少白色

唔知係唔係因為出牙仔, 不停咁咬手指, 仲要10隻手指都咬暈晒, 咬埋o的指甲, 真係激C我, 唔俾佢咬, 就大喊啦, 再瞓埋落地下, 隨時隨地唔高興就瞓地

一係就突然間玩爬牛牛, 隻手污漕, 又咬手, 有乜法唔病... 11月已經發過兩次燒, 呢個月就腸胃炎肚痛肚疴仲發埋燒, 明明退左燒兩日後又突然燒返, 食退燒藥食到好散呀, 慘慘! 係咁出汗呀, 真係閉.....  差唔多一個星期, 都仲係會肚痛同疴爛便便.... 真係唔知點算好, 真係差唔多每個月都要見一見醫生....

咩野都識, 大人講咩佢都知, 但就係唔肯講野, 依家淨係識叫baba, 最近終於肯叫婆婆, 媽媽就唔係成日都講, 一時時

你睇晴晴個樣, 係唔係好似矇矇地咁? 但其實就頑皮到暈..... 依家返到太婆度, 如果表姐唔俾佢玩玩具, 佢就會扁咀喊, 扮晒可憐咁



12月頭帶晴晴出去影聖誕裝飾, 今年有人唔肯影相呀, 仲要拉開個車蓬遮住自己.....

一來扭眼瞓, 二來已經唔肯俾大人話點就點, 真係投晒降....

有好多晚瞓到半夜就醒, 好難先氹到晴晴瞓返, 凍左o個幾晚就好o的, 多數會大覺大瞓到大光, 但有時偶爾會好早起身

小朋友每次病親都會令我好擔心! 真係要身體健康呀~女!