產檢 - wk 25

過年前既一次產檢

已經feel到bb郁喇, 大概19週左右已經feel到, 試過有一晚返外家打邊爐, 忽然係咁轉, 係咁郁, 仲要係勁大動作, 肉眼都睇到, 不過就未試過拉起晒o的衫睇住個肚郁, 可能怕凍啦, 哈哈... 一係就係當我工作緊既時候好激氣o個陣又係會勁郁, 有時半夜又會郁下, 不過又唔似其他mama咁講每晚臨訓前又會郁多o的咁, 有時我攤左o係床o個陣佢會變得好靜... 真係怪怪.....

感冒了 - wk22

好唔開心囉... 

首先係我對面個單位, 自從個租客搬走左之後, 業主就搵人黎裝修, 都唔知佢地用咁多天拿水黎做乜, 有一次返屋企既時候, 一出lift, 勁大陣"濃郁芬芳"既味充斥住成條走廊, 真係!@#$%^, 呢o的野真係唔講得笑囉... 會影響bb健康架, 已經同管理處投訴左勁多次都冇用, 有時仲會攻左入我間屋度, 真係好難頂, 試過有一次我病左早退返屋企, 個情況係更加嚴重囉! 唯有同管理處講, 你搞唔店既話我唯有報警, 佢地先拎左架大風扇出黎嘗試吹散o的味, 呢家人既裝修工程簡直係困擾左我足足6個星期, 真係好嬲好嬲呀! 呢段時候我每日返工放工都要好辛苦咁避開o的味, 個肚開始大已經唔可以再行得咁快, 試過有一次o係group floor大堂已經聞到陣味, 上到去就更加頂唔順.....touch wood請句, 如果我地兩母女有咩事我真係唔放過佢地架!!!

第二, 我真係感冒, 病左, 又唔可以飲得太多康鈣C (醫生唔recommend飲, 佢話始終係藥...), 一feel到喉嚨痛已經第一時間去左睇醫生, 點知都唔好, 最後又要提早去覆診搵返專科醫生俾感冒藥我食 (真係怕左, 自從眼藥水單野我已經好怕食藥...), 唯有non-stop咁沖檸檬水飲, 增強抵抗力... 最後病左成個幾星期先好返... 我唔要再病呀!!

又覆診 - wk19

本來係Christmas前後先再做產檢, 但因為老公Christmas要返工, 又想快o的見下bb, 所以早左去覆診...

bb一切正常, 我就愈來愈重... =.=

照結構 - wk18

星期六睇完醫生, 星期一打電話俾C醫生介紹既K醫生book照結構, 點知冇晒期, 真係好過份, $1800一次都咁多人既? 唔係咁呀化, 唯有打返俾C醫生同姑娘講, 請佢地俾多一個醫生我可以約到照結構, 最後俾左L醫生既資料我, 仲話問過有期既, 叫我打去confirm就得... 

約左今日下晝去中環照, 原來呢個L醫生都好出名, 係照結構既權威醫生喎, 收$1500, 都好過去九龍既, 唔使咁遠... 去到已經勁多人囉, 仲要好多大陸人, 佢地真係超有錢, 勁... 約左3點, 點知我早到, 都係要等, 仲要等到4點半先有得照, 入到去仲要等多15分鐘先見到個醫生, 態度串串地, 問C醫生部機唔夠清咩?? 咁.... =.= anyway佢都ok既, 照左20分鐘到, 18週, 頭仔手仔腳隻都早週數, 冇兔唇 (呢樣我勁擔心, 因為我都有, 好彩係右邊面, 唔係中間位...), 樣樣都ok, 照完已經係5點半, 咁就用左我半日時間... 真係等到個人發晒霉咁制囉... 但都值得既, 見到bb個尖尖下巴, 好過癮呀!!

我個肚都唔算大, 只係已經開始著大肚褲, 以前著開既Levis太緊, 怕cool到bb呢~

覆診喇 - wk17

星期六覆診既好處係, 唔使特意請假, 因為公司始終都唔係咁鍾意, 但唔好處係, 就算你book左幾多點都好, 都一定係會等到發呆....

今日又要抽多一次血, reconfirm個Oscar Test既result, 另一方面就係要約照結構, 要出去其他醫生先有得照, 醫生俾左封信我去約, wk22之前要完成...

每次產檢照ultra sound都唔係好覺個b有郁咁, 懶洋洋咁... 體重繼續有進帳, 就快突破100磅大關!!

等結果 - book床位- wk13

打左幾日電話都話未有報告返, 真係好心急, 而且好擔心, 心諗會唔會係因為first test有問題而要再做多一次, 所以先咁耐都未有呢... 醫生話3-4日, 但化驗所就話要5日, 又要o係封referral letter到期前去book床位, 個心真係1516.... 

最後決定, 星期五上晝去醫院交deposit book期, 之後就再打電話問結果, 好彩... 一切正常......

Oscar - wk12

放左1個星期假, 要覆工喇, 每行一步都好小心, 俾人笑我行路踩C蟻...

為左唔行咁多唔, 返工放工改坐巴士, 因為公司樓下已經有站... 老闆亦都好好人咁唔使我點OT, 所以平時都係7點前就放工, 多o的時間休息

又到左產檢既日子, 聽好多mama講照Oscar, 度bb頸皮, 但唔知點解我呢個醫生都好似冇乜點樣額外做Oscar咁, 都係同平時產檢咁照ultra sound咁睇... 同埋要驗血, 醫生叫我地3-4日後打電話黎問result, 同埋要confirm係唔係搵佢接生啦, 同埋要book醫院....

體重都係咁上下, 開始有增長喇, 而且冇嘔得咁多, 可以食返多o的野喇...

唔通真係大陸人特別多, 連私家醫院既床位都咁爆.... =.=